ЗАЦІКАЎЛЕНЫ ДЫЯЛОГ ВЫТВОРЦАЎ І СПАЖЫЎЦОЎ
Больш за 60 гасцей наведалі 17 чэрвеня вытворчую базу СП “Святавіт” у Коханаве. Прадстаўнікі будаўніча-мантажных арганізацый, якія выкарыстоўваюць тэхніку, выпушчаную гэтым прадпрыемствам, сустрэліся з яго адміністрацыяй і інжынерна-тэхнічнымі работнікамі, пазнаёміліся з новымі, сучаснымі мадэлямі, як серыйнымі, так і тымі, што яшчэ знаходзяцца ў стадыі выпрабаванняў і дапрацоўкі. Гэта, у прыватнасці, міні-экскаватар — лёгкая, манеўраная машына, прызначаная для аператыўнага выканання земляных работ ва ўмовах абмежаванай прасторы, ды і проста для таго, каб пазбавіць людзей ад нялёгкай ручной працы.
Газавікі, сантэхнікі, будаўнікі, разглядаючы выставу, мелі магчымасць задаць пытанні канструктару, інжынеру, прадстаўніку аддзела продажаў. Не менш карыснымі сталі і неафіцыйныя, асабістыя гутаркі, у якіх можна было абмяняцца меркаваннямі, падзяліцца вопытам выкарыстання святавітаўскай тэхнікі. Пры гэтым высокую ацэнку і прызнанне атрымала ўстаноўка для гарызантальнага бурэння — інавацыйная прадукцыя, якая ўжо знаходзіцца ў серыйнай вытворчасці, і пакуль што дзякуючы ёй “Святавіт” лідзіруе па аб’ёме выпуску інавацыйнай прадукцыі ў раёне.
Увогуле, сённяшні стан прадпрыемства, якасны ўзровень выпускаемай ім тэхнікі — гэта, як адзначыў у сваім выступленні галоўны інжынер Уладзімір Спектар, значны прарыў у параўнанні з тым, што было гадоў пяць таму.
— Не трэба параўноўваць нас з якім-небудзь буйным дзяржаўным прадпрыемствам накшталт МАЗа ці МТЗ. У нас, па апошніх даных, працуе толькі 130 чалавек, і спадзявацца на чыю-небудзь падтрымку, дапамогу нам не даводзіцца, усяго мы павінны дабівацца і дабіваемся самастойна. І нягледзячы ні на якія фінансавыя цяжкасці будзем старацца ўтрымлівацца на дасягнутых пазіцыях і ісці вышэй. Паляпшаць і ўдасканальваць усё, што можна, — ад гэтага свайго крэда мы ніколі не адступалі і не адступім.
Пасля дзелавой часткі сустрэчы госці мелі магчымасць пабыць гледачамі захапляльнага, азартнага відовішча — конкурсу прафесійнага майстэрства экскаватаршчыкаў. Прыняць у ім удзел і пазмагацца ў выкананні складаных практыкаванняў накшталт закідвання экскаватарам мяча ў баскетбольны кош ці складання на асфальце лагатыпа “Святавіта” з чатырох фрагментаў пажадалі васемнаццаць чалавек. Пераможцаў жа ў рэшце рэшт было вызначана трое. Яны атрымалі ў якасці прызоў ноўтбук (першае месца) і навігатары.
Дыялог вытворцаў і спажыўцоў атрымаўся прадуктыўным і паказаў, што паміж імі ёсць зацікаўленасць і паразуменне. А значыць, будзе працягвацца ўзаемавыгаднае супрацоўніцтва.
С. АБРАМОВІЧ.