ПОБАЧ З ЭКЗОТЫКАЙ
Пальмы ў садзе Соф’і Паўлаўны Саранчовай з вёскі Заднева міжволі спыняюць і затрымліваюць. Экзатычныя дрэвы, сканструяваныя ўсяго толькі з дроту і поліэтыленавых бутэлек, ствараюць добры настрой і надаюць дому своеасаблівы рамантычны каларыт.
Аўтар гэтай прыгажосці — дарослая дачка гаспадыні Вольга Чаркова, якая жыве ў Мінску.
— Падабаюцца ёй малыя архітэктурныя формы, вось і майструе, калі прыязджае дадому, — з цеплынёй і пяшчотай гаворыць пра дачку сціплая жанчына.
Пэўныя ідэі ўносіць і сама Соф’я Паўлаўна. Трапіўся неяк на вочы дзіравы шланг. Парэзала яго на часткі, пафарбавала ў жоўты колер — і атрымаліся сімпатычныя бананы — дадатак да пальмаў. Сапраўды, і непатрэбным рэчам можна знайсці прымяненне, калі ўключыць у дзеянне фантазію.
Побач з пальмамі стаіць зебра, выразаная з дрэва, крыху далей — “беларуская экзотыка”: лебедзі, чарот, карабель, мосцік… Уражвае, што ўсё гэта зроблена рукамі адной жанчыны, прычым, без спецыяльнай адукацыі. Але, мусіць, яна і не самае галоўнае, калі ёсць патрэбнасць і здольнасць тварыць прыгажосць.
С. МАРЦЫНКЕВІЧ.