ПРЫКЛАД ПРАЦАЎНІКОЎ – МАЛАДЫМ
Добрай традыцыяй у сяльчан Талачыншчыны стала правядзенне свята вёскі. У мінулую нядзелю і жыхары вёскі Мяшкова таксама адзначылі свята сваёй малой радзімы. Гэтае мерапрыемства арганізавалі і правялі загадчыца Навасельскага сельскага клуба Алена Леанідаўна Шавялёва і бібліятэкар Ганна Іванаўна Фядзяшава. Загадзя паклапаціліся, паразмаўлялі з мясцовымі жыхарамі, здабылі цікавыя звесткі, каб давесці да маладых людзей і дзятвы, якія прыйшлі на свята, пра гісторыю вёскі, яе сённяшні дзень і пра тых людзей, якія нястомнай працай у полі, на ферме трымалі і трымаюць жыццё.
Мерапрыемства праходзіла ў двары былой школы, дзе зараз знаходзіцца сельскі клуб. Даўно ўжо людзі не збіраліся так, не сядзелі разам дзеці, моладзь і заслужаныя працаўнікі. Усім было цікава паслухаць вядучых, паразмаўляць адзін з адным. Дарэчы, заўважыўшы пасеўшых у радок на доўгай лаўцы дзетак, хтосьці са старых адмеціў, што вось вырастае новае пакаленне, канешне, не такое шматлікае, як раней, і ёсць надзея, што іх родная вёска будзе жыць. Большасць прысутных нарадзіліся ў вёсцы Мяшкова, некаторыя прыехалі з іншых месц наведаць родных або прыйшлі з суседніх вёсак. Для іншых жа яна даўно ўжо стала другой радзімай.
Кожнае свята не абыходзіцца без падарункаў. Не засталіся ўбаку ад традыцыі і тут. Прайшло ўзнагароджанне ў трох намінацыях. За лепшае дызайнерскае афармленне двара адмецілі сям’ю Сяргея і Зоі Рылько, лепшай гаспадыняй падворка была прызнана Святлана Уладзіміраўна Панушкіна, а ў намінацыі “Старажыл вёскі” прыз атрымала Таісія Якаўлеўна Галанцава (на здымку).
Свята суправаджалася выступленнямі мясцовых артыстаў, у асноўным дзяцей. Напрыклад, дзяўчаты Каця Аніковіч і Люба Машковіч добра спявалі, а яшчэ прадставілі камедыйную сцэнку пра дзвюх сварлівых суседак. Таксама гледачам спадабаліся спевы самых малых дзяўчынак-артыстак. Аб чым былі гэтыя песні? Зразумела, аб Радзіме, дзяцінстве, аб матулінай пяшчоце і ўсмешках, аб усім тым, што звязвае іх з роднай вёскай.
Г. СМАЛЬЯНІНА.
