ЧЫМ ЖЫВЕ ААТ “ДРУЦК-АГРА”
Нягледзячы на тое, што на вуліцы глыбокая восень і большасць важных, неадкладных сельскагаспадарчых спраў ужо зроблена, клопатаў сяльчанам яшчэ хапае.
Механізатары занятыя падрыхтоўкай тэхнікі да пастаноўкі яе на зімовы перыяд. Большая частка тэхнікі ўжо прайшла кансервацыю — фарбаванне, разгрузку калёснай базы, пабелку — і чакае рамонту. Па словах галоўнага інжынера Дзяніса Сяргеевіча Косцікава, для правядзення якаснага рамонту машынна-трактарнага парка патрабуецца больш за дзвесце мільёнаў беларускіх рублёў. Грошы патрэбны і для запланаванай устаноўкі на мехдвары душавой кабіны. Яна разам з аддзелачнымі работамі каштуе ў сярэднім восем мільёнаў рублёў, а калі ўлічыць, што мехдвор не апальваецца (усе батарэі даўно паабразаны, застаўся адзін кацёл), то значную суму грошай патрабуецца выдаткаваць яшчэ і на ўцяпленне бытоўкі.
На жывёлагадоўчых комплексах у Сурнаўцы і Друцку такія кабіны ўжо ўстаноўлены. Зроблена гэта на карысць жывёлаводам і даяркам. Толькі вось апошнія пакрыўдзіліся зарплатай:
— За дваццаць шэсць выхадаў і сямісот тысяч рублёў не атрымала, — абураецца адна з даярак жывёлагадоўчага комплексу ў Друцку.
— У Сурнаўцы даяркі за такую ж работу чамусьці па мільёне атрымліваюць, — уступае ў размову другая.
Сярэднямесячная зарплата даярак на жывёлагадоўчым комплексе ў Друцку складае 600 — 700 тысяч рублёў, а працуюць яны па дзесяць гадзін у дзень: з 5 да 8, з 10 да 14 і з 18 да 21 гадзіны. Мабыць, ёсць над чым задумацца адміністрацыі гаспадаркі.
Нядрэнна ідуць справы на ферме па дарошчванні і адкорме жывёлы. Загадчыца Святлана Уладзіміраўна Навагонская расказала, што гадуюцца тут 750 галоў маладняку буйной рагатай жывёлы. За верасень яе сярэднясутачны прывес склаў 550 грамаў, зараз плануецца атрымаць у сярэднім на 150 грамаў больш. Абслугоўваюць ферму адзінаццаць работнікаў. Ірына Анатольеўна Карпузовіч і сям’я Валентавых — Марына Міхайлаўна, Уладзімір Анатольевіч і іх дачка Алена — працуюць тут шмат гадоў запар, чым заслужылі давер і павагу іншых работнікаў фермы.
Не за гарамі ўжо і зіма, але ў ААТ “Друцк-Агра” да гэтага перыяду гатовыя: нарыхтавана 5912 тон сіласу, 4822 тоны сенажу, 70 тон сена, 7861 тона кукурузы. Працягваюцца работы па ўздыме зябліва, вывазцы арганікі, уцяпленні сельскагаспадарчых памяшканняў.
С. МАРЦЫНКЕВІЧ.