З ПРАДАЎЦОЎ — У ПАШТАВІКІ
Сельскія паштовыя аддзяленні на сённяшні дзень з’яўляюцца ўстановамі па аказанні розных відаў паслуг. Увядзенне камп’ютарнай сістэмы дазваляе выконваць шырокі спектр аперацый. Соф’я Фёдараўна Бондарава працуе начальнікам паштовага аддзялення “Заднева” на працягу 39 гадоў.
Успамінае, як цяжка было ёй, жанчыне ва ўзросце, асвойваць розныя праграмы. Тры разы пабывала на курсах. Прызналася, з цягам часу стала нават цікава і зараз не можа ўявіць сваю працу без камп’ютара.
Паштовае аддзяленне абслугоўвае вёскі Заднева, Піямонт, Рыжычы, Міхайлаўшчыну. Соф’я Фёдараўна добра ведае іх жыхароў, з усімі добразычлівыя адносіны. Яна знаёміць з новымі выданнямі, вядзе работу па падпісцы. Не сакрэт, што сучасная моладзь аддае перавагу іншым крыніцам інфармацыі.
— План па падпісцы выконваем і нават перавыконваем, — з гонарам паведамляе Соф’я Фёдараўна. — Найбольш актыўнымі падпісчыкамі з’яўляюцца людзі сталага ўзросту, пенсіянеры. Трэба адзначыць, што яны больш цікавяцца падзеямі ў жыцці краіны, вобласці, раёна. А моладзь часцей раскуплівае зборнікі сканвордаў, анекдотаў і падобнае ім.
Роднай вёскай Соф’і Фёдараўны з’яўляецца Галошаўка. З дзяцінства марыла працаваць прадаўцом. Ёй падабалася падоўгу назіраць у мясцовым магазіне, як ідзе абслугоўванне пакупнікоў. З цягам часу мара дзяцінства прывяла яе ў Полацкае кааператыўнае вучылішча на аддзяленне прамысловых тавараў. Пасля заканчэння прыехала працаваць у Заднева, завочна паступіла ў тэхнікум на тавараведа. На жаль, закончыць вучобу не ўдалося. У хуткім часе яна выйшла замуж, нарадзіліся дзеці.
У 1971 годзе ў Задневе адкрылася аддзяленне сувязі. Соф’я Фёдараўна скончыла курсы паштовых работнікаў, набыла новую прафесію. Аб сваім выбары не шкадуе. Спецыфіка работніка паштовага аддзялення шмат у чым нагадвае работу прадаўца. А рэалізуемыя тавары карыстаюцца высокім попытам у насельніцтва.
А. СЕРАДА.