ГРАНІ ЖЫЦЦЯ І ТВОРЧАСЦІ
Сёння, 18 лютага, грамадскасць краіны адзначае 90 год з дня нараджэння вядомага беларускага мастака Міхаіла Савіцкага. Мы пабывалі на яго радзіме, у вёсцы Звянячы, наведалі краязнаўчы музей Коханаўскай сярэдняй школы, дзе беражліва захоўваецца ўсё, што распавядае пра яго лёс, раскрывае яго як асобу і творцу. Гэта разнастайныя фотаздымкі, рэпрадукцыі карцін, альбомы, публікацыі.
Нязменным дырэктарам музея працяглы час з’яўляецца выпускніца гэтае школы, а зараз намеснік дырэктара па вучэбнай рабоце (пачатковае звяно), настаўніца гісторыі Ларыса Аркадзьеўна Мацюшэўская. Менавіта да гэтага дня тут падрыхтаваная спецыяльная тэматычная экспазіцыя, праводзяцца экскурсіі, праз якія на дакументальнай аснове даносяцца да вучняў звесткі пра жыццё і творчасць народнага мастака СССР.
Асабіста Ларысай Аркадзьеўнай былі распрацаваныя некалькі год таму дзвюхгадзінныя заняткі па біяграфіі М.А. Савіцкага. Распрацоўка была прадстаўлена на абласны конкурс, атрымала высокую ацэнку.
— Штогод, — расказвае Л.А. Мацюшэўская, — калі Міхаіл Андрэевіч быў жывы, мы накіроўвалі на яго адрас віншавальную паштоўку. Ганарымся і атрыманай ад яго тэлеграмай з нагоды святкавання юбілею школы.
У жалобны дзень адыходу яго з жыцця праводзяцца ў музеі і ў класах урокі, прысвечаныя памяці Міхаіла Андрэевіча Савіцкага. Творчасць мастака дазваляе прымяркоўваць мерапрыемствы не толькі да часу, звязанага з ваенным перыядам, аднаўленнем краіны, але і да перыядаў рэвалюцыі, станаўлення беларускай нацыянальнай культуры, чарнобыльскай трагедыі і г.д.
Галоўнае, школьны музей адгукаецца на ўсе падзеі, якія звязаныя з гісторыяй роднага краю і яго славутых людзей.
В. БІРУКОЎ.
