НАСТРОЕНЫ НА АПЕРАТЫЎНАСЦЬ

У сельгаспрадпрыемстве “Слаўнае” налічваецца 13 трактароў, у тым ліку пяць энерганасычаных. Мы сустрэліся з галоўным аграномам гаспадаркі Валерыем Віктаравічам Пасюціным у час актыўнай падрыхтоўкі да веснавых палявых работ.

Вось што ён паведаміў:

— За зіму мы ўсю тэхніку падрыхтавалі. Механізатары пераправерылі кожную дэталь. Да рамонту аднесліся сур’ёзна. Канешне, некаторыя запчасткі прыйшлося купляць, хоць яны і дарагія. Зараз механізатары яшчэ раз пераглядаюць і рэгулююць свае машыны. Кадраў у нас хапае, толькі адзін “Кіравец” пакуль без гаспадара.

Прадаўжаем назапашваць мінеральныя ўдабрэнні. Адпраўляем кожны дзень машыну спачатку за азотнымі, потым па чарзе прывозім фосфарныя і калійныя. Захоўваем удабрэнні ў спецыяльных крытых памяшканнях. Арганічных угнаенняў вывезена сваімі сіламі восем тысяч тон, пяць тысяч зааралі пад кукурузу. Да пачатку пасяўной плануем вывезці яшчэ чатыры тысячы.

У размову ўключылася галоўны бухгалтар Людміла Іванаўна Яўгель:

— У гэтым годзе ў нас будзе наладжана сваё двухразовае харчаванне. Раней кожны дзень адпраўлялі машыну за абедамі, заключалі дамоўленасць з элеватарам. Летась на харчаванне было затрачана 80 мільёнаў рублёў. Пасля рэканструкцыі памяшкання падвялі электрычнасць. Засталося толькі завезці электрапліту і посуд, а кандыдатуры павароў ужо вядомыя. У мінулым годзе харчаванне механізатарам абыходзілася ўсяго дваццаць пяць тысяч рублёў у месяц. Хаця кошт прадуктаў і павялічыўся, будзем рабіць абеды як мага таннейшымі.

Прадугледжаны кіраўніцтвам і бытавыя ўмовы для механізатараў. На тэрыторыі мехдвара ёсць душ з гарачай вадой. Тут жа знаходзіцца экран, на якім вывешваюцца разлікі па заработнай плаце і на якім адлюстроўваецца віншаванне пераможцаў. У гаспадарцы распрацаваны план пасяўной, згодна з ім работы павінны быць праведзены ў дзесяцідзённы тэрмін.

А. СЕРАДА.