ТУТ ЗАДАВАЛЬНЯЮЦЬ НАШЫ БЯСКОНЦЫЯ ПАТРЭБЫ
Галоўнай крыніцай даходаў камбіната бытавога абслугоўвання на сённяшні дзень можна назваць швейную вытворчасць. Няспынна ідуць людзі са сваім адзеннем, якому патрабуецца той ці іншы від рамонту, паступаюць заказы і ад прадпрыемстваў. Спецадзенне, пашытае ў нашым КБА, можна ўбачыць і на сельгасработніках, і на тых, хто заняты ў прамысловасці, да таго ж не толькі ў нашым раёне. У цяперашні час, напрыклад, выконваецца заказ па пашыве халатаў для Аршанскага льнокамбіната.
У ПАШЫВЕ ХАЛАТАЎ ДЛЯ АРШАНСКАГА ЛЬНОКАМБІНАТА ЎДЗЕЛЬНІЧАЮЦЬ ЗАКРОЙШЧЫЦЫ СВЯТЛАНА ГЛЯК І ЛЮДМІЛА КАТАН.
У швейных цэхах кіпіць работа, ёй у гэтыя дні загружаныя ўсе работніцы. Ляжаць стосы гатовых вырабаў, якія хутка адправяцца да заказчыкаў, круцяцца швейныя машынкі, размотваюцца і размотваюцца бясконцыя кіламетры нітак, уплятаюцца ў тканіну, шчыльна і надзейна пранізваюць яе — і выходзіць з-пад рук людзей прыгожая і зручная вопратка. Кіруе ўсімі гэтымі працэсамі вядучы спецыяліст па арганізацыі вытворчасці і прафсаюзны лідар Таццяна Дуран.
Не спыняецца актыўнае жыццё і на іншых участках дзейнасці прадпрыемства. Гэта добра відаць па рабоце, напрыклад, дыспетчара Ларысы Шаўчук.
— Я за тое і люблю сваю працу, што пастаянна з людзьмі даводзіцца мець справу, — расказвае яна. — Тут заказы прывезлі, тут гатовыя трэба аддаць, тут нехта патэлефанаваў наконт рамонту халадзільніка, запісваю адрас і сама тэлефаную ў Оршу, дамаўляюся… Дынамічная такая работа, хоць і дыспетчар, здаецца, на месцы сядзіш, а ў той жа час і бачыш, як жыццё бяжыць, адчуваеш сябе ў яго плыні.
І не толькі дыспетчар, а ўсё прадпрыемства, якія б цяжкасці яно ні перажывала, знаходзіцца на самым хуткім, самым імклівым участку жыццёвай плыні. Многа каму патрэбныя яго часам незаменныя паслугі, многа чаго трэба паспець зрабіць яго работнікам кожны дзень — зрабіць, каб назаўтра зноў узяцца за працу, нястомна задавальняючы ўсё новыя і новыя патрэбы насельніцтва.
С. АБРАМОВІЧ.
