ДЗІКІЯ КАБАНЫ ПАДОХЛІ З ГОЛАДУ

Факты падзяжу дзікіх кабаноў давялося расследаваць напрыканцы красавіка камісіі ў складзе прадстаўнікоў ветэрынарнай службы, лясгаса, раённай структуры таварыства паляўнічых і рыбаловаў.

У лясным масіве недалёка ад Лагаўшчыны раней было выяўлена некалькі трупаў кабаноў-сяголеткаў без слядоў гвалтоўнай смерці, у тым ліку агнястрэльных раненняў. Адразу ўзнікла падазрэнне на якую-небудзь заразную хваробу. На шчасце, яно не апраўдалася. Але радавацца таксама няма чаму, бо жывёліны памерлі ўсё ж у пакутах, і самі не парадаваўшыся жыццю, і паляўнічых не парадаваўшы сабой у якасці здабычы.

Адзін труп быў ускрыты, унутраныя органы ўзятыя на даследаванне.

У выніку выяўлены наступныя паталагічныя змяненні: вярхушкі лёгкіх з прыметамі запалення (зменены колер, адрэзаны кавалак тоне ў вадзе), ачагі запаленняў у тонкім і тоўстым кішэчніках (катаральнае запаленне). Акрамя таго, кабан вельмі знясілены (худы, поўнасцю адсутнічае тлушч, нават на сэрцы, дзе ён знікае ў самую апошнюю чаргу), страўнік і тонкі кішэчнік зусім пустыя. На аснове ўсіх даследаванняў быў пастаўлены наступны дыягназ: ачажок пнеўманіі, катаральны энтэрыт, катаральны каліт, агульная дыстрафія мышачнай тканіны. Прычынамі, якія выклікалі захворванне і падзеж, названыя доўгае галаданне ў зімовы перыяд і спажыванне ў ежу малапрыдатнай расліннасці.

С. АБРАМОВІЧ.