БЕЗ ІХ КЛОПАТУ І ПРАЦЫ ЗЯМЛЯ НЕ ДАСЦЬ УРАДЖАЮ
Нямала работ акрамя ўласна меліярацыйных выконвае Талачынскае ПМС. Ачыстка палёў, знос старых збудаванняў, планіроўка мясцовасці… Да таго ж працаваць даводзіцца нярэдка і за межамі раёна: у Крупскім (ААТ “Кляновічы”), Бялыніцкім (будаўніцтва дарогі). І галоўнае, што пры гэтым удаецца ўкладвацца ў тэрміны, выконваць планы па рэканструкцыі і доглядзе сваіх меліярацыйных сістэм.
У цяперашні час вядуцца работы па рэканструкцыі сістэм на землях ААТ “Абольцы” і УП “Рыдамльскі”. Напрыклад, плошча сістэмы “Рыдамльскі-1″ 92 гектары. Тут неабходна пракласці 18 кіламетраў і 650 метраў дрэнажу. Па стане на канец мая было пракладзена ўжо 9 кіламетраў і 34 метры.
— Здаваць аб’ект трэба ў верасні, — расказаў намеснік дырэктара прадпрыемства Нікалаевіч А.Л., — але пастараемся паспець нават да жніўня. Поле гэтае цяпер не выкарыстоўваецца з-за вялікай вільготнасці, а ўжо сёлета можна будзе сеяць азімыя. Мяняем стары дрэнаж, дадаткова капаем канаву ўздоўж лесу.
Угрызаецца ў зямлю стары ЭТЦ — траншэйны экскаватар, дрэнаўкладачная машына 80-х гадоў выпуску, незаменная яшчэ і сёння (нездарма над яе ўдасканаленнем працуе Коханаўскі экскаватарны завод). Паступова, метр за метрам укладваюцца замест старых новыя керамічныя трубкі, па якіх зноў свабодна пацячэ вада — і поле высахне, стане прыдатным для нармальнага вядзення сельгасработ. А людзі з незвычайнай тэхнікай адправяцца далей, у іншыя мясціны, дзе зямля без іх дапамогі не зможа прыносіць усім нам карысць — даваць ураджаі.
С. АБРАМОВІЧ.