ТУРЗЛЁТ ПРАЙШОЎ ЦІКАВА І ЗАПАМІНАЛЬНА
Чарговы турыстычны злёт школьнікаў раёна сёлета прайшоў у асаблівай атмасферы. Ён быў прымеркаваны да 90-годдзя піянерскай арганізацыі.
— Адчувалася гэта ва ўсім, а асабліва — у конкурсе патрыятычнай песні, — расказала старшыня раённай піянерскай арганізацыі, дырэктар раённага цэнтра дзяцей і моладзі Шылала Г.Р. — Мы прысвяцілі яго памяці Ларысы Гвоздзевай. Яна стаяла на чале піянерскага руху ў раёне, узначальвала наш Дом піянераў, кіравала клубам “Пошук”, пад яе апекай знаходзіўся Пакой піянерскай славы (своеасаблівы музей гісторыі піянерыі ў Талачынскім раёне). Гэта была жанчына, шчыра адданая сваёй справе, укладвала ў яе ўсю душу і сілы.
Зразумела, двухдзённае жыццё на ўлонні прыроды было насычанае спартыўнымі спаборніцтвамі. Паласа перашкод, арыентаванне на мясцовасці, стральба з пнеўматычнай вінтоўкі — колькі цікавых, займальных забаў прапанавалі вучням арганізатары!
Праходзіла мерапрыемства пад кіраўніцтвам аддзела адукацыі ў супрацоўніцтве з аддзелам па справах моладзі (ім набыта частка прызоў) і раённай структуры ДТСААФ (арганізацыя спаборніцтваў па стральбе і прыз за перамогу ў іх).
Пасля падліку балаў за ўсе конкурсы і спаборніцтвы агульнакамандныя месцы размеркаваліся наступным чынам: першае — першая школа, другое — раённая гімназія, трэцяе — Гаршчэўшчынская сярэдняя школа. Але па-сапраўднаму перамагло, зразумела, як заўсёды, сяброўства: дзеці і падлеткі з розных вёсак, з розных куткоў раёна знайшлі новых сяброў, сустрэліся са старымі, з кім даводзіцца бачыцца не кожны дзень, і яшчэ мацней адчулі, усвядомілі, што ўсе мы — грамадзяне адной краіны, якія павінны працаваць дзеля яе росквіту і быць гатовымі пры патрэбе абараніць яе.
С. АБРАМОВІЧ.
