ЛЮБІМАЯ ПРАЦА
ЧАСАМ НЯЛЁГКА, АЛЕ ЗАЎСЁДЫ ЦІКАВА І ПРЫЕМНА — АПРАНАЦЬ ІНШЫХ
Вераніка Гурская, Алена Хмылкова і Аксана Мядзвецкая працуюць у ТДА “Юніформ” з часу яго заснавання, хутка ўжо 4 гады. Сваімі стараннасцю і майстэрствам яны робяць важкі ўклад у паспяховую дзейнасць усяго калектыву.
— 100 касцюмаў шыюцца ў нас літаральна за 3-4 дні, заказы заўсёды выконваюцца поўнасцю, — расказвае дырэктар прадпрыемства Ірына Іванова. — Заказчыкі ёсць і са свайго раёна, і з Сенненскага, і з Круглянскага, і з Мінска, так што нагрузкі нам хапае. Але дзяўчаты з усім спраўляюцца, усё ім па сілах. Вераніка заўсёды гатовая ўзяцца за любую новую мадэль, якой бы складанай яна ні была, — і асвоіць яе, зробіць усё якасна, сумленна. Таленавітая дзяўчына Аксана, яна ў нас і майстар сваёй справы, і ў калектыве завадатар, актыўная, энергічная.
Алена прыйшла ў “Юніформ”, як і сяброўкі, швачкай, а цяпер яна тэхнолаг — вытворчы працэс пачынаецца толькі пасля таго, як яна грунтоўна, усебакова вывучыць яго тэарэтычна: расход матэрыялаў, паслядоўнасць аперацый па падрыхтоўцы новай мадэлі і г.д. І пасля ў працэсе працы яна заўсёды гатовая дапамагчы, падказаць, растлумачыць, калі ўзнікнуць якія-небудзь цяжкасці.
Халаты, курткі, касцюмы, камбінезоны, камізэлькі — у кабінеце дырэктара вялікая і маляўнічая, рознакаляровая выстава ўзораў прадукцыі. Такія прыгожыя і зручныя рэчы, запатрабаваныя ва ўсёй краіне, у многіх галінах вытворчасці! Колькі соцень і тысяч спецыялістаў на розных прадпрыемствах з задавальненнем носяць іх! І з’яўляецца гэтая вопратка на свет у невялікім, незаўважным, знешне нічым не адметным будынку ў Райцах. Але не сама па сабе з’яўляецца, а выходзіць з-пад рук сімпатычных і вясёлых, усмешлівых і шчырых дзяўчат і жанчын, якія з задавальненнем робяць сваю справу.
Справа іх, хоць і адносіцца да так званай лёгкай прамысловасці, часта бывае вельмі няпростай, патрабуе нямала цярпення і настойлівасці. Вельмі добра трэба пастарацца, пакуль наб’еш руку, прышываючы розныя спецыфічныя кішэні, петлі і іншыя нязвыклыя элементы, неабходныя на спецадзенні будаўнікам, сантэхнікам, дарожнікам… І паспець пажадана як мага хутчэй. Але для сапраўднага прафесіянала няма нічога немагчымага: вырашаюцца ўсе задачы, дасягаюцца мэты, узбагачаецца вопыт, расце майстэрства — і прыходзіць задавальненне ад усведамлення таго, што вынікі тваёй працы прыносяць карысць сотням і тысячам іншых людзей. І, можа быць, нехта з гэтых людзей сёння, у Дзень работнікаў лёгкай прамысловасці, у думках падзякуе, успомніць добрым словам жанчын, з якімі сам не знаёмы, але якія паклапаціліся пра яго камфорт, хутка і якасна выканаўшы заказ па пашыве чарговай партыі спецадзення для яго фірмы.
С. АБРАМОВІЧ.
