У НОВЫМ АБЛІЧЧЫ І НА НОВЫМ МЕСЦЫ
Ферма “Дабравольск” ААТ “Абольцы”… пераязджае. Называцца яна будзе па-ранейшаму, але ў сваім новым выглядзе паўстане ўжо не каля самога Дабравольска, як раней (у водаахоўнай зоне, з-за чаго заўсёды існавала небяспека ўзнікнення розных праблем экалагічнага характару), а на супрацьлеглым канцы Абольцаў, злева, калі ўязджаць у вёску з боку дарогі Талачын — Сянно.
Фармальна, па дакументах зараз ажыццяўляецца капітальны рамонт фермы з мадэрнізацыяй. Так яно ёсць і рэальна, проста нязвыкла ўсведамляць, што ў абноўленым выглядзе аб’ект з’явіцца на новым месцы.
Работы вядуць аршанскія будаўнікі, фінансаванне — з бюджэту (цэмент, шыфер, руберойд) і за ўласныя сродкі (усё астатняе).
Пакуль што статак, які ўтрымліваўся ў “Дабравольску”, знаходзіцца на пашы, у кароўнік жывёлу прыганяюць на дойку (гэта адзіны статак, які доіцца не на полі). А восенню, калі настане час вяртацца да стойлавага ўтрымання, ужо будзе гатовая новая ферма — збудаванне плошчай 0,1659 гектара (памяшканне для ўтрымання кароў — плёначнік) на ўчастку ў 0,25 гектара. Умяшчальнасць яе ў параўнанні са старой павялічыцца — са 100 да 150 галоў. А значыць, ёсць і перспектыва нарасціць пагалоўе.
С. АБРАМОВІЧ.