ШЫНАМАНТАЖ У ТАЛАЧЫНЕ: НОВЫЯ ПЛАНЫ І ПЕРСПЕКТЫВЫ

У чэрвені споўнілася 8 гадоў з таго часу, як індывідуальны прадпрымальнік Сяргей Шырокаў стаў займацца ў Талачыне аказаннем шынамантажных паслуг. У гэтай справе ён быў першапраходцам, калі не лічыць зачыненай нядаўна СТА пры нафтабазе.

Бізнэсам сваім задаволены, умовы працы спрыяльныя: і кліентаў дастаткова, і прыбытак можна атрымліваць стабільна.

— Падаткі ўмераныя, — дзеліцца сваімі назіраннямі, — справу рабіць ніхто не перашкаджае. Абсталяванне нядаўна абнавіў, новыя станкі, яшчэ двух гадоў не прайшло, як купіў, так што можна сказаць, тэхнічная аснашчанасць самая сучасная. Бывае, канечне, і яшчэ больш дасканалае абсталяванне, але мне яго набываць няма сэнсу: не той паток кліентаў у нас і не той узровень цэн, каб можна было ўкласці тысяч пятнаццаць долараў.

Але для якасці аказання паслуг гэта ўжо не прынцыпова, і шынаматнаж, і балансіроўку, і рамонт шын Сяргей Шырокаў выконвае хутка і надзейна. Да таго ж адпачываць на лаўрах ён не збіраецца, а будзе ўкладваць сродкі ў развіццё сваёй справы ў іншым напрамку — узяў участак зямлі недалёка ад ДТСААФ, каб пабудаваць уласную майстэрню і пераехаць у яе з гаража, які пакуль што арандуе. На новым месцы будзе і прасторней, камфортней, і атрымаецца пашырыць спектр паслуг.

— Хачу яшчэ праўкай дыскаў заняцца, толькі станок дастаткова вялікі, сюды ўжо ніяк не памесціцца. А на новым месцы прапаную кліентам і гэты від абслугоўвання.

Паслуга, несумненна, патрэбная і будзе карыстацца попытам. Роўны дыск — адна з умоў даўгавечнасці шыны і прыемнай, мяккай язды. Таму планы Сяргея ва ўсіх адносінах перспектыўныя для яго самога і карысныя для цяперашніх і будучых кліентаў.

С. АБРАМОВІЧ.