НЕ ЗАБУДЗЬЦЕСЯ: У СУБОТУ — ДЗЕНЬ БЕЗ АЎТАМАБІЛЯ
ПАКЛАПОЦІМСЯ АБ ПРЫРОДЗЕ — І ЯНА АДДЗЯЧЫЦЬ НАМ
Практыка мінулых гадоў паказвае, што акцыя “Дзень без аўтамабіля” ў нашым раёне праходзіць не вельмі актыўна. Тут нават нельга ўжыць слова “праходзіць”: на дарогах не становіцца менш машын і больш веласіпедыстаў і пешаходаў. Тых грамадзян і службовых асоб, якія 22 верасня свядома і рашуча, дзейсна, падмацоўваючы словы справай, гавораць “не!” забруджванню атмасферы і адмаўляюцца ад шкоднай для здароўя гіпадынаміі, — адзінкі. У мінулым годзе, напрыклад, калі памятаюць нашы чытачы, мы змаглі назваць толькі супрацоўнікаў раённай экалагічнай інспекцыі і аднаго з яе былых начальнікаў.
Гэта не дзіўна, падобныя мерапрыемствы хоць і пачалі праводзіцца яшчэ ў 70-я гады, але масава, па ўсім свеце распаўсюджвацца сталі, як паведамілі нам у раённай экалогіі, з 2000-га. Патрэбна шмат часу, каб інфармацыя спачатку проста дайшла да нас, а пасля яшчэ была ўсвядомлена як стымул да дзеяння, перайшла ў разрад асабістых перакананняў.
З гэтай мэтай неабходна актыўна працаваць літаральна ўсім арганізацыям і ведамствам — не толькі па магчымасці адмаўляючыся ад язды на машыне і займаючыся асветніцкай, прапагандысцкай дзейнасцю, але і ствараючы ўмовы, напрыклад, для больш шырокага выкарыстання веласіпедаў, абсталёўваючы месцы іх стаянкі, бяспечнага захоўвання (як, у прыватнасці, на “Белтрубпласце” ці КЭЗе).
Сёлета раённая інспекцыя прыродных рэсурсаў і аховы навакольнага асяроддзя распрацавала наступны план мерапрыемстваў, прымеркаваных да Дня без аўтамабіля. Пачынаючы з 17 верасня запланаваныя распаўсюджванне лістовак, абследаванне месцаў стаянак веласіпедаў пры аб’ектах гандлю, установах адукацыі і Ў іншых грамадскіх месцах, інфармацыйная гадзіна ў прадпрыемстве меліярацыйных сістэм.
— У Беларусі за дзень з адпрацаванымі газамі выкідваецца ў атмасферу ў сярэднім 3,3 тысячы тон шкодных рэчываў, што прыкладна эквівалентна 55-ці чыгуначным вагонам, — расказвае начальнік раённай экалогіі Крывецкі П.П. — Калі ў 2008 годзе Дзень без аўтамабіля ўпершыню прайшоў у нашай краіне, атмасфера была абароненая ад выкідвання ў яе, паводле прыкладных ацэнак, 400 тон забруджвальных рэчываў. Акрамя таго, аўтатранспарт — гэта яшчэ і небяспека, гібель людзей і жывёл у ДТЗ.
Зразумела, аднадзённая акцыя не зможа вырашыць усе праблемы негатыўнага ўздзеяння аўтамабіляў на навакольнае асяроддзе і чалавека, але яна будзе вялікім укладам у паляпшэнне экалагічнай сітуацыі і ўмацаванне бяспекі на дарогах. Усім нам пажадана па магчымасці прыняць у ёй удзел і пастарацца проста па-іншаму зірнуць на жыццё — адчуць, што яно стане не менш цудоўным, прыгожым і зручным, калі мы адмовімся ад тэхнікі там, дзе без яе можна абысціся. Станем бліжэй да прыроды, будзем больш беражлівымі да яе — і яна, не парушаная намі, уратаваная, захаваная для нашчадкаў, аддзячыць нам прыгажосцю і здаровым навакольным асяроддзем.
С. АБРАМОВІЧ.
