ЗАХАВАЦЬ ТЭХНІКУ Ў НАЛЕЖНЫМ СТАНЕ

У мінулы панядзелак сіноптыкі ўпершыню прадказалі мінусавыя тэмпературы. Не паспееш азірнуцца, як прадкажуць і дажджы, і снег. Сельгастэхніка, што захоўваецца пад адкрытым небам і зімой не выкарыстоўваецца, павінна быць падрыхтаваная, а дакладней — абароненая ад неспрыяльнага надвор’я, закансерваваная.

Пастаноўка камбайнаў на зіму ў ААТ “Абольцы” пачалася яшчэ два тыдні таму. Сітуацыя на мехдвары такая ж, якая была вясной і летам на палях: ва ўмовах кадравага дэфіцыту працуюць усе, ад інжынера да пенсіянера.

— Яны ўдваіх, а я адзін,  — расказвае механізатар, змазваючы рабочыя органы свайго камбайна і ківаючы на суседні. — Напарнік і ў мяне быў, ды зараз кароў доіць. А мне самому ўжо да пенсіі дзевяць месяцаў засталося…

— Новы камбайн прыгналі пад канец уборачнай, не было каму даць, мяне пасадзілі, — успамінае нядаўнія падзеі інжынер. — Думалі спачатку і не ўводзіць у эксплуатацыю, не столькі той уборкі было, колькі пасля чысціць яго трэба, але ўсё ж калі ёсць адзінка тэхнікі і чалавек, які можа ёй кіраваць, то ў напружаны момант магчымасць трэба выкарыстаць.

А цяпер, зразумела, трэба яшчэ і паклапаціцца аб захаванні ўсіх машын, каб у наступным годзе яны зноў эфектыўна служылі вытворчым патрэбам, каб можна было без лішніх праблем выкарыстоўваць іх па прызначэнні.

С. АБРАМОВІЧ.