УБОРКА КУКУРУЗЫ
СЕЛЬГАСВЫТВОРЦАЎ ПАДВОДЗІЦЬ НЕ ТОЛЬКІ НАДВОР’Е
А яшчэ, як вядома, і тэхніка. 22 кастрычніка. На мехдвары УП “Надзёжына” стаяць два кормаўборачныя камбайны.
Ім бы зараз не стаяць, а ехаць па кукурузным полі, але пакуль што гэта немагчыма: абодва выйшлі са строю. У беларускім КВК “Палессе” сапсаваўся рухавік, у нямецкім “Ягуары” сагнуўся вал кідалкі (кола з лопасцямі, якое падае зялёную масу ў сіласаправод для высыпання ў кузаў аўтамабіля) — з-за таго, што ў працэсе працы адвалілася адна пласціна (лопасць).
Усяго ў “Надзёжыне” на сённяшні дзень ёсць тры адзінкі тэхнікі, якія могуць займацца ўборкай кукурузы. Значыць, пакуль праводзіўся рамонт, працавала толькі адна.
— Калі гадоў дзесяць таму ён толькі з’явіўся ў гаспадарцы, дык працаваў па ўсім раёне, усім убіраць дапамагаў, — расказваюць механізатары пра “Ягуара”. — Ну, а цяпер, канечне, паднасіўся, ужо не тое, што раней, столькі адхадзіў…
А вось наконт другой машыны давялося пачуць зусім не такія памяркоўныя выказванні. Рамонт ужо набліжаўся да завяршэння, але нават гэтая прыемная акалічнасць пасля праведзеных пад камбайнам гадзін не радавала механізатара:
— І хто такое дзіва прыдумаў?! Эх, папаўся б мне той канструктар! Матор паставілі — аж 450 конскіх сіл, а ён жа не цягне ні хваробы! А падлезці да яго як? Ні да стартара, ні да чаго! Ну, вось, паглядзіце, дастаньце мне гэты фільтр — як яго дастаць, калі трэба ключом адкручваць знізу? КСК — вось быў калісьці камбайн! А цяпер невядома што зрабілі.
— Нейкая цёмная паласа пайшла ў нашым жыцці, — заўважылі працаўнікі поля, якім давялося на некаторы час стаць майстрамі гаечнага ключа. — Час ідзе, надвор’е не чакае, а мы стаім…
Па стане на 30 кастрычніка ў цэлым па раёне было ўбрана 5166 гектараў кукурузы з 6749-ці, або 77%. Работы яшчэ нямала, і людзі робяць усё, што ад іх залежыць, каб хутчэй завяршыць яе.
С. АБРАМОВІЧ.
