РАМОНТ ТЭХНІКІ
ДА ЛЕПШЫХ ЧАСОЎ ТРЭБА АБЫХОДЗІЦЦА ТЫМ, ШТО ЁСЦЬ
Убачыўшы ў мехмайстэрні ААТ “Абольцы” легкавы УАЗ, на якім ездзіў ветурач, можна падумаць, што прыцягнулі яго сюды, каб разабраць на запчасткі і металалом. Але пазбавіцца ад гэтай іржавай, з асеўшым кузавам машыны было б вялікай раскошай.
— Шкада спісваць, няма на чым ездзіць, так што будзем рамантаваць, — гаворыць галоўны інжынер Цімур Зубаўжэн (на здымку). — Кузаў у ім праваліўся, таму так асеў.
Побач стаіць яшчэ адзін УАЗ, толькі грузавы. Гэта транспарт заатэхніка. У ім праведзена замена інжэктарнай сістэмы на карбюратарную, цяпер засталося толькі пераабсталяваць адпаведным чынам электроніку.
— Катушку знайшлі, супраціўлення яшчэ няма. Машыне гады чатыры (я сам тут першы год раблю), з іх год нармальна адхадзіла, а далей пачалося — кожны месяц на рамонт. У інжэктарах уся праблема, таму рашылі пазбавіцца ад іх.
Аб’ём работ па рамонце разнастайнай тэхнікі сёлета ў “Абольцах” вялікі. Немалыя патрабуюцца для гэтага і сродкі.
— Шэсць фарсунак трэба замяніць у адным МТЗ-3022. Матор дэтройтаўскі, кожная фарсунка восем мільёнаў каштуе. На пасяўныя агрэгаты таксама буйная сума пойдзе. Мінулай вясной неяк адсеяліся, а на будучую ўжо абавязкова трэба грунтоўна заняцца гэтай тэхнікай, да ладу давесці. Увогуле, зрабіць трэба многа чаго, але сродкі… Грошы ўсе ў асноўным на ферму пайшлі — на рэканструкцыю.
Значыць, застаецца толькі пажадаць, каб рэканструкцыя хутчэй акупілася і ўкладзеныя ў яе сродкі сталі вяртацца, даючы магчымасць і запчасткі набываць без праблем, і нават старыя машыны мяняць на новыя. А пакуль што, да лепшых часоў, трэба шукаць і знаходзіць выйсце з тым, што ёсць.
С. АБРАМОВІЧ.