ХУТКА БУДЗЕМ ВЫБІРАЦЬ ЁЛКІ
Забяспечыць насельніцтва і арганізацыі галоўным традыцыйным навагоднім упрыгажэннем, абараніць лес ад незаконнага высякання елак, а таксама зарабіць грошай — гэтыя важныя задачы стаяць у цяперашні адказны перадсвяточны перыяд перад работнікамі лясной гаспадаркі. Як будзе весціся нарыхтоўка елак для рэалізацыі, мы пацікавіліся ў Аболецкім лясніцтве.
— Участкі для нарыхтоўкі ўжо вызначылі, — расказаў 5 снежня дырэктар лясніцтва Вышадкевіч А.І. — У мінулым годзе ў нас, на жаль, атрымалася накладка з транспартам, сапсавалася машына, таму паспелі прадаць толькі 250 адзінак. А вось у пазамінулым годзе рэалізавалі 700 елак. І сёлета ў нас ёсць усе магчымасці для выніковай працы ў гэтым напрамку.
Рэалізацыя вядзецца не толькі ў раёне, але і за яго межамі. Летась, напрыклад, было арганізавана 4 выезды ў Віцебск. І самі кліенты прыязджаюць, каб забраць свой тавар.
— З Оршы прыязджала адна фірма, бралі елку метраў пяць вышынёй, сабе на арганізацыю. Дарэчы, калі гаварыць пра памеры, то самыя хадавыя — да метра, недарагія. Радзей бяруць людзі елку да двух метраў, і зусім рэдка — да трох.
Што да формы, сіметрычнасці, прыгажосці, то ў гэтым сэнсе любое лясніцтва зацікаўленае ў тым, каб прапанаваць толькі самае лепшае, бо елку трэба не проста высекчы і даставіць на кірмаш, а яшчэ і прадаць. Таму трапляюць да спажыўцоў сапраўды лясныя прыгажуні — і вобразна, і літаральна кажучы.
С. АБРАМОВІЧ.