ТУТ ІХ ЧАКАЮЦЬ І ЗАЎСЁДЫ ІМ РАДЫ
У чарговы раз вучні Коханаўскай сярэдняй школы наведалі тэрытарыяльны цэнтр кругласутачнага прабывання. Хлопчыкі і дзяўчынкі, што прадстаўлялі пачатковыя класы, выказвалі прысутным пажаданні заўсёднай радасці, аптымізму, здороўя і даўгалецця праз сур’ёзныя і жартаўлівыя вершы, песні, выконвалі танцавальныя нумары. І гэты цуд, дзіцячая непасрэднасць, няўрымслівасць, добры настрой, крануў сэрцы бабуль і дзядуляў. Яны падтрымлівалі дзятву апладысментамі, выказвалі падзяку за падрыхтоўку нумароў педагогу-арганізатару школы Але Канстанцінаўне Коласавай.
Школа не пабаялася цяжкасцей, добраахвотна ўзяла на сябе абавязак дапамагаць сацыяльнай установе. З удзелам юных самадзейных артыстаў прайшлі канцэрты, прымеркаваныя да 8 Сакавіка, Дня абаронцаў Айчыны, Дня пажылых людзей. Да апошняга мерапрыемства падрыхтавалі тарты, паднеслі пачастунак разам з паштоўкамі.
Лішніх матэрыялаў сёння ў школе няма, але дырэктар яе Міхаіл Міхайлавіч Татарановіч ідзе насустрач, дзеліцца тым, што ёсць. Былі выраблены ўпрыгажэнні ў выглядзе карцін, размешчаны на бачным месцы, стэнд “Нашы будні”. У гэтым значную дапамогу разам са сваімі выхаванцамі аказаў настаўнік працоўнага навучання школы Аляксандр Анатольевіч Міхайлоўскі.
У распрацоўцы герба ўстановы таксама не абышлося без удзелу педагогаў. У гэтым якраз найлепшы прыклад выхавання ў вучняў павагі да старэйшых людзей, шанавання зробленага імі для нашага краю, роднай зямлі.
В. БІРУКОЎ.
