На палях кансервавага завода працуюць студэнты
Летні дзень год корміць — сцвярджае народнае выслоўе. Сапраўды, з наступленнем гарачай пары ўборкі ўраджаю кожны дзень добрага надвор’я на вагу золата. У такі час ніводныя рукі не бываюць лішнімі. Самы разгар збору ягад у прамысловым садзе Талачынскага кансервавага завода. На дапамогу прыбыў студэнцкі атрад, сфарміраваны ў трох віцебскіх вну — тэхналагічным, медыцынскім і падагагічным універсітэтах, усяго каля 70 чалавек. Кіраўніцтва грамадскай арганізацыі БРСМ на агульных сходах студэнтаў звярнулася з заклікам у дабравольным парадку дапамагчы сабраць ураджай ягад. Некаторыя юнакі і дзяўчаты згадзіліся, і ўжо амаль месяц жывуць і працуюць у нашым раёне. Для іх створаны добрыя ўмовы для пражывання, трохразовае харчаванне. А тыя, хто выконвае норму, вызваляюцца ад платы за яго. І гэта яшчэ адзін стымул для паспяховай працы. Жарты, вясёлы смех не змаўкаюць на працягу ўсяго рабочага дня. Студэнт чацвёртага курса тэхналагічнага ўніверсітэта Дзмітрый Гмыза падзяліўся ўражаннямі:
— За гэты месяц мы пасябравалі са студэнтамі іншых вну. Абменьваемся думкамі аб вучобе, арганізацыі вольнага часу. Агульная праца, пражыванне ў інтэрнаце спрыяюць усталяванню цёплых чалавечых кантактаў і сяброўства. Гэта ж вельмі здорава — разам і працаваць, і адпачыць. Упэўнены, многім з нас запомняцца гэтыя дні назаўсёды. Канешне, работа адказная. Ягады трэба збіраць якасна, чыста, каб не заставаліся на кустах. Спачатку было складана, потым прывыклі. Стараемся выканаць норму, ад гэтага залежыць наш заробак.
Мы пацікавіліся ў бухгалтэрыі, на які заробак могуць разлічваць студэнты. Нам паведамілі, што ў аплаце будзе ажыццяўляцца дыферэнцыраваны падыход. Па папярэдніх даных, іх заробак складзе ад 2 мільёнаў рублёў. У пачатку жніўня юнакі і дзяўчаты раз’едуцца па дамах, каб адпачыць перад пачаткам новага семестра.
А. СЕРАДА.