У Талачыне ўзводзіцца дзіцячы дом сямейнага тыпу
Калі ўсё пойдзе добра, то ў недалёкай будучыні ён адчыніць дзверы для сваіх жыхароў — шматдзетнай прыёмнай сям’і. Не будзем пакуль што апярэджваць падзеі, канкрэтна называючы будучых насельнікаў гэтай сядзібы, якая размясцілася на ўскраіне Талачына за былой тэкстыльнай фабрыкай.
Работы выконвае ПВУП “Друць”. Будаўніцтва пачалося ў верасні, і на цяперашнім этапе, як паведамілі нам у райвыканкаме, можна гаварыць аб тым, што ўсё ідзе па плане: па стане на 26 кастрычніка будынак быў амаль гатовы, кладка вялася на ўзроўні даху, да дома былі падведзены камунікацыі, ад вуліцы сядзіба адгароджана бетонным плотам, астатняя частка перыметру абнесена драўляным. Словам, будучае жыллё ўсё больш набліжаецца да свайго канчатковага выгляду. Гаварыць аб канкрэтнай даце ўводу ў эксплуатацыю, зразумела, трэба асцярожна (з улікам таго, наколькі праблемная ў нашым раёне будаўнічая галіна), паводле папярэдняй ацэнкі, верагодным тэрмінам здачы дома можа стаць канец лістапада.
С. АБРАМОВІЧ.
У Талачыне ўзводзіцца дзіцячы дом сямейнага тыпу,