Пра шынамантаж трэба падумаць загадзя
Некаторыя аўтаўладальнікі, напэўна, паспелі ўжо замяніць летнія шыны на зімнія: яшчэ дзесьці ў пачатку кастрычніка ў некаторых СМІ мільганула інфармацыя аб тым, што чакаецца пахаладанне і не трэба марудзіць з “пераабуваннем”.
Праўда, гэтыя прагнозы, як відаць, не паспяшаліся спраўджвацца, і аказалася, што яшчэ як мінімум месяц можна было без асаблівых праблем ездзіць “у летнім рэжыме”. Дарэчы, і аўтамабілісты нібыта прадбачылі гэта — на шынамантажах у апошні час не назіралася вялікіх “міжсезонных” чэргаў, характэрных для восені і вясны. Але ўсё ж наведаць аўтамайстэрню сапраўды лепш загадзя, каб пасля не губляць час.
— Пакуль што ў нас зацішша, вось сёння было пару машын, — расказаў 5 лістапада Аляксандр Шульгін, які абслугоўвае кліентаў у шынамантажнай майстэрні АТП №11, — але з практыкі мінулага года магу сказаць, што як толькі выпадзе першы снег, так адразу кліентаў з’явіцца шмат, нават узнікне чарга.
У майстэрні новае абсталяванне, устаноўленае год таму. Паслугі тут аказваюць уладальнікам легкавых і грузавых аўтамабіляў — усе асноўныя віды работ, акрамя праўкі дыскаў: замена шын і штуцэраў (вентыляў), заклейванне дзірак, балансіроўка, па жаданні кліента — зняцце і ўстаноўка колаў.
Да першага снегу з першымі маразамі, а далей і да сапраўднай зімы часу застаецца ўсё менш. І хутка той, хто своечасова паклапаціўся пра шынамантажныя работы, адчуе, як цудоўна, што ён праявіў такую прадбачлівасць.
С. АБРАМОВІЧ.
НА ЗДЫМКУ: Аляксандр Шульгін і практыкант Аршанскага механіка-эканамічнага каледжа Ягор Бераснякоў.