Лесавозы разбілі гарадскую дарогу
Аб тым, каб праехаць па вуліцы Заслонава ў Талачыне на легкавой машыне, няма чаго і думаць, і пешшу хадзіць тут, мякка кажучы, не вельмі зручна, асабліва ў цёмны час сутак. Паралельна вуліцы ляжыць чыгунка, а да яе пад’язджаюць гружоныя лесавозы – гэта і стала прычынаю нездавальняючага, проста недапушчальнага стану дарогі.
У першай палове лістапада прадпрыемствам “Талачын-камунальнік” на адрас лясгаса накіраваны ліст з паведамленнем аб тым, што дарога не прызначана для руху вялікагрузных транспартных сродкаў, і з патрабаваннем тэрмінова прывесці яе ў належны стан. Акрамя таго, у лісце агавораны ўмовы ўзнаўлення руху вялікагрузных машын па вуліцы Заслонава: для гэтага лясгасу прапанавана спачатку пабудаваць участак дарогі, па якім неабходна ездзіць лесавозам, у адпаведнасці з патрабаваннямі дарожнага будаўніцтва.
18 лістапада, калі зроблены фотаздымак, нічога для аднаўлення дарогі, як відаць, зроблена не было. Зразумела, гэтае балота і ўсе гэтыя канавы ды ямы адным махам цяпер не ліквідуеш, не асушыш і не выраўняеш, але навошта было даводзіць да такога стану? Чаму было не прыняць меры раней – падсыпаць, прагрэйдзіраваць, калі ўсё знаходзілася яшчэ не ў такім гаротным стане?
С. АБРАМОВІЧ.
