Неабходна мабілізаваць сілы для своечасовага і якаснага рамонту тэхнікі
Рамонт тэхнікі ў сельгаспрадпрыемствах у гэтыя дні павінен ісці поўным ходам: час палявых работ мінуў, трактары задзейнічаныя толькі на раздачы кармоў і вывазцы арганікі — і механізатары могуць заняцца тэхабслугоўваннем сваіх машын, пошукам і выпраўленнем няспраўнасцей.
Як ідуць гэтыя справы ў ААТ “Звянячы”, мы пацікавіліся ў канцы мінулага тыдня, 29 лістапада.
У арачніку акуратна выстраіліся ў рад камбайны. Тут жа стаіць некалькі трактароў, некаторыя з іх разабраныя.
— Вось з гэтага каробку знялі, у рамонт здалі, — расказвае загадчык мехмайстэрні Анатоль Манькоўскі, — а гэты пакуль што не чапаем, ён на гарантыі. Гарантыйшчыкаў выклікалі — паабяцалі прыехаць толькі праз два тыдні. Таксама з каробкаю ў ім нешта здарылася, задняя перадача знікла. Вось яшчэ адзін МТЗ разабраны, і пагрузчык пакуль што не на хаду.
Віды рамонту, якія можна правесці ўласнымі сіламі, механізатары выконваюць самастойна, наколькі дазваляюць гэта рабіць матэрыяльна-тэхнічная база і фінансавае становішча прадпрыемства.
Эканамічная сітуацыя ў сельскай гаспадарцы ў цяперашні час, вядома, складаная, таму набыццё запчастак і аплата рамонту даюцца нялёгка. І ўсё ж час, які яшчэ ёсць да вясны, неабходна пастарацца выкарыстаць як мага больш прадуктыўна — мабілізаваць усе сілы і арганізаваць працу такім чынам, каб паспець выканаць усе актуальныя задачы па прывядзенні машынна-трактарных паркаў гаспадарак у належны стан.
У. МІХАЙЛАЎ.