Коханаўскія паштальёны: ім рады ў кожнай хаце
Коханаўскае аддзяленне паштовай сувязі абслугоўвае больш за пяць тысяч чалавек, якія пражываюць у гарадскім пасёлку Коханава і ў навакольных вёсках. Пад кіраўніцтвам начальніка аддзялення Алены Барысаўны Мацюшэўскай паспяхова працуюць тут шэсць паштальёнаў.
Сельскі паштальён — надзвычай запатрабаваная і неабходная прафесія. Той, хто працуе даўно, добра вывучыў патрэбы і густы жыхароў вёсак у перыядычных выданнях. Жанна Мотыль пражывае ў вёсцы Рэчкі, працуе паштальёнам чацвёрты год. Пасля закрыцця мясцовага аддзялення кожны дзень выязджае ў Коханава, каб атрымаць для аднавяскоўцаў іх любімыя газеты і часопісы і даставіць на спецыяльнай аўтамашыне. Чакаюць яе і ў маланаселеных вёсках Старое і Новае Рцішчава, Замосце, Барашы і Хаценічы, бо ў пэўныя дні яна прывозіць сюды пенсію.
Паштальён Ірына Савік забяспечвае перыёдыкай Заазер’е і Галошава, а Анжэла Каранькова дастаўляе пошту ў вёскі Кругі, Шапчына, Праровіна, Пуські, Кувечына. Як адзначыла Алена Барысаўна, кожная з іх добра ведае сваю справу. Жыхары гэтых населеных пунктаў вельмі ўдзячныя сельскім паштальёнам за культурнае абслугоўванне. Акрамя таго яны прымаюць у людзей на даму плацяжы за электраэнергію, тэлефон, нярэдка выконваюць просьбы пажылых лю-дзей прывезці лякарствы, тавары, прадукты харчавання.
Мікрараён Коханава і прыватны сектар абслугоўваюць паштальёны Марына Антаневіч, Святлана Пацешкіна і Ірына Ракіцкая. Яны пастаянна вядуць работу сярод насельніцтва па своечасовай падпісцы на перыядычныя выданні, знаёмяць кліентаў з навінкамі перыёдыкі, адказваюць на цікавячыя іх пытанні.
Найбольшую колькасць газет і часопісаў, паведаміла Алена Барысаўна, выпісваюць людзі сталага ўзросту. Напрыклад, з задавальненнем выпісваюцца рэспубліканская газета “Советская Белоруссия”, абласная “Витебские вести”, амаль у кожнай хаце можна ўбачыць раённую газету “Наша Талачыншчына”. Карыстаюцца вялікім попытам і часопісы “1000 советов”, “Домашний”, “Сваты”, “Незнайка” і іншыя.
А. СЕРАДА.
