Ільнозавод аднавіў працу ў тры змены
На Коханаўскім ільнозаводзе зноў удалося арганізаваць кругласутачную перапрацоўку трасты, у тры змены. Такая арганізацыя вытворчага працэсу тут даўно ўжо не прымянялася – з-за недахопу людзей і іншых цяжкасцей.
Трохзменны рэжым дзейнічае з 2 снежня. Набралі дадаткова новых людзей, прыцягнулі механізатараў – і такім чынам удалося загрузіць вытворчыя лініі поўнасцю. Хапае і сыравіны, на пачатак снежня запас складаў амаль 5000 тон, для Коханаўскага льнозавода гэтага хопіць на два гады бесперапыннай працы.
Збыт атрыманага льновалакна таксама ажыццяўляецца паспяхова, аператыўна, а значыць, праца ў тры змены – гэта шанц падцягнуцца, умацаваць слабыя месцы, якіх у дзейнасці завода пакуль што, на жаль, хапае (і, як вынік, праблемным пытаннем з’яўляецца нават выплата зарплаты).
Вясною, калі механізатары, задзейнічаныя ў перапрацоўцы, зоймуцца падрыхтоўкаю тэхнікі і палявымі работамі, праца ў тры змены зноў можа аказацца пад пытаннем. Хаця да гэтага часу яшчэ трэба дажыць, і тады будзе відаць, як што атрымаецца. Калі, напрыклад, збыт прадукцыі будзе прыносіць стабільны прыбытак, то нішто не перашкодзіць набраць яшчэ больш людзей, заахвоціўшы іх добрымі заробкамі. Хацелася б верыць, што менавіта так усё і будзе.
С. АБРАМОВІЧ.
Ільнозавод аднавіў працу ў тры змены,
