Добраўпарадкаванне: жыхары ў Славенях змянілі выгляд свайго двара
Як толькі пад цёплым вясеннім сонейкам пачала падсыхаць зямля, гаспадары заварушыліся каля сваіх сядзіб. Пачалі падграбаць смецце, вызваляць зямлю ад леташняга бруду.
Трохпавярховыя дамы №1 і №2 па вуліцы Савецкай у Ламіншчыне былі заселены ў 1980 годзе. З таго часу будынкі страцілі былую шыкоўнасць. А кватэра №17 дзесьці каля двух дзясяцігоддзяў “упрыгожвае” двор забітымі вокнамі. Мясцовыя жыхары толькі паціскаюць плячыма, што пустуе чатырохпакаёвая добраўпарадкаваная кватэра. І гэта ў той час, калі жылля ў раёне не хапае, а будаваць новае каштуе вялікіх сродкаў.
У чарговы раз выйшаўшы на “перакур”, мужчыны прыкінулі, абмеркавалі паміж сабой і вырашылі змяніць выгляд свайго двара. Арганізатарамі гэтага добрага пачыну сталі Леанід Галіеўскі, Уладзімір Бабіцкі, Андрэй Нарчук. Для пачатку прыбралі смецце каля сваіх пад’ездаў. Пасля пачысцілі тратуар, падрыхтавалі месца пад клумбы. З’явілася ідэя зрабіць сплеценую з лазы агароджу. Хтосьці прапанаваў з колаў вырабіць лебядзяў. Некалькі дзён завіхання і працы — і двор не пазнаць.
Не адсталі ў добраўпарадкаванні і жыхары дома №2 — устанавілі і пафарбавалі невялікі плот. Думаецца, гэта не апошнія штрыхі ў новым выглядзе двара.
А. СЕРАДА.
