Чым сустрэне наш прыдарожны сэрвіс гасцей чэмпіянату свету па хакеі?
Да пачатку гэтага грандыёзнага мерапрыемства застаюцца, можна сказаць, лічаныя дні, менш, чым месяц. Ці гатовы да масавага наплыву наведвальнікаў прыдарожны сэрвіс на тэрыторыі нашага раёна? Магчыма, пра масавы наплыў гаварыць і не варта, бо хто ведае, ці не будуць усе спяшацца адразу ў эпіцэнтр падзей, у сталіцу, але ўсё роўна неабходна рыхтавацца да таго, каб сустрэць замежных гасцей дастойна і пакінуць у іх самае лепшае ўражанне аб сваёй краіне.
На мінулым тыдні мы ўявілі сябе расійскімі балельшчыкамі, якія едуць у Мінск па трасе М1, і завіталі ў першыя тры пункты прыдарожнага сэрвісу ў Талачынскім раёне з боку Аршанскага. Нічога прынцыпова новага ў іх дзейнасці не заўважылі, усе працуюць у штатным рэжыме, прапаноўваюць стандартны асартымент тавараў і паслуг.
Наведвальнікаў кафэ “Хутарок” сустракаюць у фае хакеісты — у форме і з клюшкамі, хоць і не сапраўдныя, а толькі на плакаце, які на англійскай мове абвяшчае: “2014, сусветны чэмпіянат па хакеі на лёдзе, Беларусь, Мінск”. Дарэчы, у астатніх пунктах прыдарожнага сэрвісу ніякія хакейныя сімвалы нам на вочы не трапілі, так што на іх фоне “Хутарок” атрымаў плюс. Праўда, не абышлося і без мінусу. Дзверы, праз якія трэба прайсці, накіроўваючыся з фае ў залу для прыёму ежы, у час нашага візіту патрабавалі рамонту, у іх закліньваў даводчык (прыстасаванне, дзякуючы якому дзверы, адпушчаныя чалавекам, плаўна, без стуку самі зачыняюцца). Не парадавала вока і аблезлая, нават не аблезлая, а проста суцэльна ржавая “талерка” спадарожнікавай антэны над уваходам у кафэ. Хаця, відаць, не кожны падыме на яе позірк, бо з-за дзвярэй усіх заклікае хутчэй увайсці апетытны пах гарачых страў.
Кафэ “Імпульс” (райспажыўтаварыства) таксама сустрэла прыемным, апетытным пахам, толькі ўжо іншага характару: паветра ў памяшканні было напоўнена водарам выпечкі. Будынак дагледжаны, чысты, акуратны звонку і ўнутры, тэрыторыя таксама добраўпарадкаваная. Двое мінчан расплаціліся за каву і паспяшаліся ў дарогу. Гасцінная, утульная атмасфера прымушала і нас узяць з іх прыклад, але з-за неабходнасці працаваць аператыўна прыклад атрымалася ўзяць толькі часткова — паспяшацца.
У кафэ “7 вятроў” з часу нашага апошняга візіту (каля паўгода таму) таксама, на першы погляд, кардынальна нічога не змянілася, усё на сваіх ранейшых месцах, той жа інтэр’ер, тыя ж па-слугі. Па-ранейшаму заязджаюць сюды паесці і пераначаваць дальнабойшчыкі і іншыя падарожнікі, сярод якіх, як і ў іншых пунктах прыдарожнага сэрвісу, ёсць пастаянныя кліенты, а значыць, замежным гасцям тут падабаецца (гутарку з двума такімі частымі наведвальнікамі мы апублікавалі ў адным з нядаўніх нумароў).
Чаго, на наш погляд, не хапае вышэйназваным пунктам прыдаржнага сэрвісу ў святле набліжэння чэм-піянату свету па хакеі? Па-першае, святочнай атмасферы (магчыма, варта ўпрыгожыць памяшканні якою-небудзь хакейнаю сімволікай, аднаго плаката ў фае мала), і, па-другое, сувенірнай прадукцыі з нацыянальным каларытам (адпаведныя паліцы заўсёды і ва ўсіх прыдарожных кафэ нашага раёна выглядалі вельмі бедна). Зразумела, самі ўладальнікі пунктаў харчавання і адпачынку лепш ведаюць, што ім патрэбна для паспяховага вядзення бізнэсу, — у першую чаргу смачна карміць падарожнікаў, ці клапаціцца пра знешні, паказны бок сваёй дзейнасці, укладваць сілы і сродкі ў стварэнне арыгінальнага, вытанчанага, стыльнага інтэр’еру, на які кліенты, можа быць, і ўвагі не звернуць. Але ўсё ж у сувязі з такой маштабнаю падзеяй міжнароднага значэння варта праявіць больш фантазіі і творчасці, пакуль яшчэ на гэта ёсць час.
С. АБРАМОВІЧ.
НА ЗДЫМКУ: фрагмент інтэр’еру кафэ “Імпульс”.