Віншаванні прынялі лепшыя з лепшых
Набліжаецца чарговае Свята працы. У адпаведнасці з традыцыяй напярэдадні 1 Мая прайшло ўрачыстае мерапрыемства па ўшанаванні перадавікоў, занесеных на раённую Дошку гонару па выніках працы за мінулы год.
Перад удзельнікамі і гасцямі ўрачыстасці, якая гэтым разам адбывалася ў будынку гарадскога кінатэатра, выступіў старшыня раённага Савета дэпутатаў Мурашка Г. Г.
– Талачынская зямля заўсёды славілася сваімі працаўнікамі і іх дасягненнямі, адзначыў Георгій Георгіевіч. – І сёння ў працоўных калектывах арганізацый нашага раёна нямала людзей, якія ведаюць сваю справу і ўмеюць працаваць з поўнаю аддачаю. Яны вызначаюцца ўменнем ставіць перад сабою вялікія задачы і ўпэўнена выконваць іх. Поспех забяспечаны кожным працаўніком, якому дарагія гонар, добрае імя калектыву, аўтарытэт раёна, горада, рэспублікі.
Сёлета раённую Дошку гонару ўпрыгожаць партрэты, як звычайна, прадстаўнікоў розных прафесійных сфер. Гэта работнікі і кіраўнікі сельскагаспадарчых і прамысловых прадпрыемстваў, гандлю, будаўніцтва, аховы здароўя, адукацыі, сферы паслуг, органаў правапарадку і бяспекі.
– Вельмі няпроста было выбраць лепшых з лепшых, – прызнаўся старшыня райсавета. – Вялікі ўсім дзякуй і нізкі паклон за добрасумленную працу. Няхай гэтае цудоўнае свята дадасць вам аптымізму, веры ва ўласныя сілы, паслужыць стымулам для далейшага развіцця, а адпаведна і росквіту.
Цырымонію ўручэння грамат і падарункаў упрыгожылі і зрабілі больш разнастайнаю, вясёлаю юныя і дарослыя артысты, якія выступілі з песнямі і танцамі. Прыемна, што нават прырода нібыта паклапацілася аб тым, каб ва ўсіх у той дзень быў добры настрой, і падаравала нам сонечнае і цёплае надвор’е. Няхай жа яно заўсёды пануе ў душах усіх людзей дзякуючы дастатку і дабрабыту, які яны будуць здабываць сваёй працаю.
У. МІХАЙЛАЎ.
Віншаванні прынялі лепшыя з лепшых,