Пастух улетку — асоба важная
У летні перыяд якасць і ўзровень надояў малака залежаць ад правільнага ўтрымання кароў на пашы. Пад’ехаўшы на поле, дзе пасвіўся статак сельгаспрадпрыемства райаграсэрвіс, упэўніліся, што тут створаны менавіта тыя ўмовы, каб атрымліваць добрыя надояі. У статку 156 кароў, даглядаюць іх пастухі ў дзве змены.
Прынята лічыць, што праца пастуха — не жаночая справа. А вось Наталля Фёдараўна Барташэвіч, якая жыве ў Воўкавічах, пасвіць кароў ужо другі год, раней працавала цялятніцай. На пытанне, чаму яна выбрала няпросты занятак, адказала, што прывабіў заробак, вырашыла перад пенсіяй папоўніць сямейны бюджэт. Яе напарнік — Васіль Віктаравіч Франкевіч, жыве па-суседстве. У любое надвор’е яны на сваім пасту, прыглядваюць за каровамі.
На момант нашага прыезду пастухі толькі што перагналі статак на свежае месца, дзе трава некранутая, падзяліліся некаторымі тонкасцямі тэхналогіі выпасу кароў. Калі загон занадта вялікі, то ўсю траву жывёлы не з’ядаюць, палавіну вытоптваюць. Пастухі вырашылі крыху паменшыць загон, каб часцей пераганяць статак. Трэба адзначыць, трава добрая, і каровы з задавальненнем спажываюць сакавіты зялёны корм.
Жывёла забяспечана вадой, соллю, атрымлівае камбікорм. Даенне трохразовае. Цікаўлюся, што летам у большай меры ўплывае на ўзровень надояў. На думку Наталлі Фёдараўны, пэўны ўплыў аказвае ў асноўным надвор’е.
— Некалькі дзён назад, у спякоту, — дадае Васіль Віктаравіч, — перагналі кароў на свежую траву. Дык, ведаеце, мала хадзілі, больш ляжалі. А другім разам збяруцца і стаяць каля балеі з вадой. Яно і зразумела, усякаму жывому падчас спякотнага надвор’я цяжка. А карова, вядома, малака ў такім выпадку многа не дасць. Прыходзіцца рпаіць некаторыя захады, каб пасвілася, кармілася і давала прадукцыю.
А. СЕРЕДА.
Пастух улетку — асоба важная,