Святар – заступнік Езуса на зямлі
Учора ў талачынскім касцёле св. Антонія адбылася вялікая ўрачыстасць для вернікаў. Ксяндзы Дзяніс Крываносаў і Юзаф Парфяновіч пасля заканчэння духоўнай семінарыі ў Олтажэве (Польшча) ўпершыню правялі першую сваю Святую Імшу.
Ва ўрачыстасці прынялі ўдзел прадстаўнікі каталіцкага ордэна манахаў-палатынцаў, да якога належаць маладыя святары, ксяндзы, семінарысты, законныя сёстры-палатынкі з Беларусі і Польшчы. Цёплыя словы віншавання і шчырыя пажаданні святарам у іх нялёгкай службе на Божай ніве выказалі прыхажане.
— Святар — заступнік Езуса на зямлі. Вы прадсталі ў таямніцы святарства. Людзі вымалілі для вас гэтае пакліканне. Ваша святарства — гэта заслуга бацькоў, святароў, парафіян, талачынскай зямлі. Трэба памятаць, каб служэнне Богу было заўсёды на першым месцы, – пажадаў ксёндз Станіслаў Вашкевіч, які некалькі гадоў служыў у Талачыне і пакінуў добры ўплыў на душу моладзі.
У выбары жыццёвага шляху Дзяніса і Юзафа ў значнай ступені паспрыяў і святар Кшыштаф Мікалайчык, пры якім хлопцы прыслужвалі ў храме ў якасці міністрантаў. Потым была вучоба ў семінарыі, падчас якой яны наведвалі родную зямлю, касцёл, у якім прыхажане заўсёды маліліся за іх. І вось настаў час, калі Дзяніс і Юзаф у якасці ксяндзоў упершыню прычашчалі прыхажан. Прычасце з родных рук атрымалі і бацькі, браты, сёстры і родныя маладых святароў.
Пасля богаслужэння Дзяніс і Юзаф выказалі словы падзякі Богу за дараванае жыццё і дар паклікання, бацькам і родным, ксяндзам, якія працавалі і працуюць у парафіі, законным сёстрам, настаўнікам і класным кіраўнікам, братам-палатынцам, аднакурснікам, сябрам, прыхажанам касцёла, усім добрым людзям, з якімі давялося ім сустрэцца ў жыцці, за добрыя парады, дапамогу, прыклад чэснага і сумленнага жыцця.
Наперадзе — самастойная служба ў горадзе Бярозе на Беоасцейшчыне для Дзяніса і ў Воранаве для Юзафа. А пакуль што летнія месяцы яны будуць паслугоўваць капеланамі ў бальніцах Гданьска.
М. ХМЯЛЮК.