Задавальняць патрэбы пакупніка — гэта і праца, і талент
Прадуктовая крама № 82 (“Радуга”) райспажыўтаварыства знаходзіцца на ўскраіне горада і знешне нічым не кідаецца ў вочы, звычайны невялікі буднак са сціплаю знешняю і ўнутранаю аддзелкаю, якую нават і асвяжыць не пашкодзіла б. Тым не менш гэтая гандлёвая кропка адна з самых лепшых: паспяховае выкананне планаў тавараабароту (нягледзячы на тое, што праз дарогу — дастойны канкурэнт, крама “Золотой колос”), парадак у дакументацыі і справаздачнасці, згода і спрыяльная атмасфера ў калектыве — так характарызуе “Радугу” адміністрацыя райспажыўтаварыства.
— Я тут працую з лістапада 2011 года, — расказвае загадчыца крамы Ірына Коршун (на здымку зправа). — Разам з Веранікаю мы ўжо другі год. Яшчэ адна наша супрацоўніца ў дэкрэтным водпуску, але мы спраўляемся ўдваіх. Калектыў наш невялікі, але дружны, стараемся, сіл сваіх не шкадуем.
Увогуле ж Ірына Уладзіміраўна ў спажыўкааперацыі з 1990 года. Не навічок у гандлёвай справе і яе напарніца Вераніка Сідаровіч. Працавала ў краме элеватара, а пасля выхаду з водпуску па догляду дзіцяці ёй прапанавалі перайсці сюды.
— З Ірынаю Уладзіміраўнаю я ўжо была знаёмая, таму згадзілася, бо ў нашай працы дружны калектыў, узаемапаразуменне і падтрымка — вельмі важны фактар.
Зразумела, паспяховая дзейнасць калектыву магчымая пры ўмове, што ён не толькі дружны, а яшчэ і прафесійны, што кожны чалавек у ім робіць сваю справу дасканала і ахвотна, з любоўю.
— Пакупнік павінен цвёрда ведаць, быць упэўненым: вось калі я сюды прыйду, то абавязкова куплю тое, што мне трэба. А калі ён раз прыйшоў і не знайшоў таго, што шукаў, другі раз, то ў трэці раз сюды ўжо не пойдзе. Таму мы стараемся вывучаць і задавальняць пажаданні людзей — не толькі вытрымліваць асартыментны пералік, а яшчэ і адэкватна рэагаваць на змяненне попыту, аператыўна заказваць тавар, які хутка разыходзіцца. Ну, і само сабою зразумела, ветлівасць, увага — без гэтага ніяк нельга.
Сапраўды, накіроўваючысая ў тую ці іншую гандлёвую кропку, чалавек не проста збіраецца атрымаць там патрэбны яму тавар, а яшчэ і чакае добрага стаўлення да сябе, падсвядома хоча адчуць сябе жаданым госцем. І ён у поўнай меры задавальняе свае патрэбы, знаходзіць тое, чаго шукае, толькі тады, калі абодва гэтыя яго жаданні, імкненні выконваюцца.
С. АБРАМОВІЧ.