Спаборнічалі аварыйныя брыгады газавай службы
На базе райгаза прайшлі занальныя спаборніцтвы аварыйных брыгад газавай службы. У іх прынялі ўдзел каманды з Полацка, Оршы, Шуміліна, Гарадка, Докшыцаў, Ушачаў, Дуброўна. Пераможцамі сталі прадстаўнікі прадпрыемства “Ушачырайгаз”.
Падобнае мерапрыемства праводзіцца кожны год, спачатку ў форме занальных спаборніцтваў, пасля на абласным і рэспубліканскім узроўнях. Праграма складаецца з тэарэтычнай і практычнай частак, у ходзе якіх спецыялісты дэманструюць свае прафесійныя веды і ўзровень майстэрства. Пошук і ліквідацыя парыву газаправоду, рамонт газавага абсталявання — усё, з чаго складаюцца будні аварыйных брыгад, на конкурсе трэба зрабіць пад пільным наглядам судзейскай калегіі, ведаючы, што не проста выконваеш прывычную што-дзённую працу, а адстойваеш гонар усяго свайго калектыву.
Нягледзячы на тое, што прафесійная дзейнасць работнікаў газавай сферы строга і адназначна рэгламентавана тэхналагічнымі нормамі, інструкцыямі і правіламі бяспекі, усё ж кожная канкрэтная сітуацыя, з якой яны сутыкаюцца, нясе ў сабе штосьці новае і патрабуе здольнасці хутка зарыентавацца і прыняць правільнае рашэнне. Таму арганізацыя, на базе якой праводзяцца спаборніцтвы, сама ўдзел у іх не прымае, каб усе ўдзельнікі знаходзіліся ў роўных умовах — у максімальна новых, незнаёмых абставінах. Такім чынам, для нашага райгаза ўдзел у конкурсе яшчэ наперадзе, талачынская аварыйная брыгада пакажа сваё майстэрства 15 ліпеня ў Шаркоўшчыне. А пакуль што прадпрыемства паспяхова выканала сваю задачу па арганізацыі спаборніцтваў, забяспечыўшы іх правядзенне на належным узроўні.
С. АБРАМОВІЧ.
