Перадавікі: дзве тысячы тон каштоўнага грузу
Лідарам прамежкавых спаборніцтваў сярод вадзіцеляў, занятых на перавозцы ўраджаю, стаў Аляксандр Парахонька з УП “Рыдамльскі”. Па стане на 8 жніўня ён першым у раёне перавёз 2000 тон збожжа.
На сваім МАЗе з прычэпам Аляксандр Пятровіч аказаўся якраз на мехдвары прадпрыемства, калі яго прыехала павіншаваць з чарговым працоўным дасягненнем старшыня райкама прафсаюза Зуева В. І. Пара хвілін на цёплыя словы і ўсмешкі – і перадавік зноў сеў за руль: паток збожжа з пасяўных плошчаў “Рыдамльскага” яшчэ не спыніўся, таму трэба спяшацца, перавозчыка чакаюць камбайны, зернесушылкі, склады. Толькі зладжаная, без збояў на ўсіх этапах праца дазваляе сабраць і захаваць ураджай максімальна эфектыўна, без страт, і вадзіцелю ў гэтым ланцужку ўзаемазвязаных вытворчых працэсаў належыць вялікая роля.
С. АБРАМОВІЧ.
