Ураджай-2014: праца, якая аб’ядноўвае ўсе пакаленні і прафесіі
Валерый Лямніцкі працуе ў “Надзёжыне” толькі другі год, але ўвогуле ён механізатар з вялікім вопытам. А яшчэ – проста працавіты чалавек, які, па водгуках калег, заўсёды робіць сваю справу добрасумленна і ахвотна, з любоўю і, калі трэба, нястомнаю настойлівасцю. Таму заканамерна, што на ўборцы збожжавых ён апынуўся ў ліку тысячнікаў.
У памочнікі Валерый узяў сына свайго суседа – Аляксандра Клімовіча. Звычайна малады чалавек працаваў на ўборачнай з бацькам (у ААТ “Абольцы”), ды сёлета ў бацькі ўзніклі праблемы з камбайнам.
Дарэчы, Аляксандр паспяхова закончыў школу і паступіў у Мінск на інжынера-праграміста. Цяпер яго чакаюць захапляльнае студэнцкае жыццё ў вялікім горадзе і цікавая вучоба, але будучы ўладальнік інтэлектуальнай прафесіі не адмовіўся і ад магчымасці папрацаваць на полі – зарабіць грошай і зрабіць уклад у важную справу своечасовай уборкі ўраджаю.
Сяргей АБРАМОВІЧ.
