Стартавала сяўба азімых
Дзень пачатку сяўбы азімых у ААТ “Коханава-Агра” выдаўся на дзіва сонечным. Урачыстасць мерапрыемству надавала і выступленне самадзейных артыстаў аўтаклуба пад кіраўніцтвам Людмілы Ждановіч у народных касцюмах, аздобленая рознакаляровымі стужкамі конская вупраж, сявейка са збожжам.
Пасля малітвы айцец Дзмітрый акрапіў поле, тэхніку і прысутных кіраўнікоў, аграномаў і інжынераў сельскагаспадарчых прадпрыемстваў раёна з пажаданнем добрага ўраджаю ў наступным годзе. Аб тым, як гэтае як мага лепш зрабіць, абмеркавалі удзельнікі раённага семінара прама ў полі.
Як адзначыла намеснік начальніка ўпраўлення сельскай гаспадаркі і харчавання райвыканкама Аксана Красоўская, толькі дакладнае выкананне патрабаванняў агратэхнікі пры падрыхтоўцы глебы і сяўбе азімых, прыёмаў вырошчвання азімых культур дазволіць забяспечыць паспяховую іх перазімоўку і атрыманне высокага ураджаю. Усяго ж у раёне належыць пасеяць 19920 гектараў азімых у тэрмін да 20 верасня.
Марыя ХМЯЛЮК.
