У гасцях у казкі: прыцягвае позірк утульнасцю і хараством двор Славенскай сярэдняй школы
Цяпер цяжка ўявіць сабе школьніка, які б не валодаў камп’ютарам. А колькі з іх праводзяць свой вольны час за камп’ютарнымі гульнямі, праглядам мультыкаў з жыцця пачварных монстраў, іншых замежных жудасных персанажаў са зброяй у руках…
Таму асабліва прыцягвае позірк сваёй утульнасцю і хараством двор Славенскай сярэдняй школы. Здаецца, быццам выпадкова трапіў у добрую казку. Задумліва стаяць буслы, з-пад ёлак выглядваюць вялізныя грыбы баравікі. А нядаўна тут пасяліліся чароўныя і велькі добрыя лесавікі ў капялюшыках (на здымку).
— Ініцыятар гэтай прыгажосці — Святлана Арсеньеўна Журава, настаўніца абслуговай працы. Сапраўдны энтузіяст, яна стараецца навучыць дзяцей бачыць прыгожае і незвычайнае ў простых рэчах. Яе задумкі ўвасабляюць у жыццё ўсе — і дзеці, і дарослыя. Асабліва Святлана Арсеньеўна любіць працаваць з футрам, займаецца вырабам цацкі. Ёсць задумкі і на далейшае ўпрыгожванне школьнага двара. Праўда, не хапае падручнага матэрыялу, той жа трубы, дроту… Штосьці прыносіцца з дому настаўнікамі і вучнямі, штосьці купляем за свой кошт, — расказаў дырэктар школы Анатоль Анатольевіч Белагураў падчас нашага візіту.
Як добра, што ў нашым жыцці сустракаюцца людзі, якія сваёй працай і ўмеласцю рук шчодра дораць людзям штодзённую радасць і прыгажосць.
Марыя ХМЯЛЮК.
