Пачалася падрыхтоўка да Новага года
У гэтыя апошнія дні каляндарнай восені мы маглі б яшчэ і не думаць аб тым, што праз месяц будзем адзначаць Новы год і Каляды. Да таго ж і зіма не паспяшалася парадаваць нас снегам, так што настрой зусім заканамерна заставаўся б па-сапраўднаму восеньскім — шэрым і пустым, калі б не гандлёвыя прадпрыемствы, якія нагадалі ўсім пра набліжэнне свята.
Наведвальнікаў талачынскага ўніверсама “Талака” ўжо сустракае Дзядуля Мароз. Сваіх пакупнікоў чакаюць падарачныя наборы для дзяцей. Як паведаміла нам намеснік старшыні райспажыўтаварыства Наталля Абравец, усе гандлёвыя кропкі раёна штогод загадзя рыхтуюцца да любімых усімі святаў. Пададзены заяўкі на новыя паступленні ёлачных цацак, гірляндаў і іншых упрыгажэнняў, сувеніраў, падарункаў. Частка з іх фарміруецца прадаўцамі, прадугледжана і падрыхтоўка святочных падарункаў для дзяцей па заяўках навучальных устаноў. Прадпрыемствы могуць загадзя заказаць памяшканне для правядзення навагодніх мерапрыемстваў.
Да свята яшчэ застаецца цэлы месяц, і многае трэба зрабіць для таго, каб яно адбылося, але атмасфера ў крамах ужо стварае ўсім радасны настрой.
Марыя ХМЯЛЮК.