З клопатам пра зямлю: будзе вада чыстай
Вадаём на тэрыторыі Коханаўскай сярэдняй школы — адно з любімых месцаў дзяцей і дарослых. Калісьці, як толькі акрэпне лёд, сюды з клюшкамі спяшаліся мясцовыя хлапчукі. Настаўнікі прыводзілі вучняў паназіраць за прыродай у розныя поры года.
З цягам часу вада мутнела, а берагі зарасталі ракітнікам і асакою. Шмат часу прайшло з таго моманту, калі апошні раз праводзілася ачыстка вадаёма. І зноў узнікла неабходнасць прывесці яго ў парадак. З гэтай мэтай Коханаўскай СШ былі выдзелены грашовыя сродкі ў памеры 20 мільёнаў рублёў, сабраных падчас правядзення восеньскага раённага суботніка. Пры дапамозе работнікаў Талачынскага ПМС на даным этапе асноўныя работы завершаны. Пры неабходнасці летам рабочыя зноў прыедуць сюды, каб яшчэ раз падраўняць берагі. Дырэктар школы Міхаіл Міхайлавіч Татарановіч паведаміў, што існуе вусная дамоўленасць таксама з СП “Святавіт” аб прадастаўленні тэхнікі для канчатковага завяршэння работ.
Быццам дзякуючы людзям за клопат, з-пад зямлі ў некалькіх месцах прабіліся крынічкі, і вадаём паступова запаўняецца чыстай вадой.
Алена СЕРАДА.
НА ЗДЫМКУ: адзін з момантаў правядзення ачысткі вадаёма работнікамі Талачынскага ПМС.