Як тэхніку падрыхтуеш, так вясной і папрацуеш
У мінулым месяцы ўпраўленнем сельскай гаспадаркі і харчавання былі створаны дзве групы ў складзе начальніка і галоўных спецыялістаў упраўлення, кіраўнікоў і галоўных інжынераў сельскагаспадарчых прадпрыемстваў, якія праверылі пастаноўку тэхнікі на зімняе захоўванне. Вынікі агляду былі разгледжаны на агульным сходзе ў ААТ “Зорны-Агра”. Тым гаспадаркам, дзе былі выяўлены недахопы, вызначаны тыднёвы тэрмін для выпраўлення становішча. Як яны з гэтым справіліся, выявілася падчас падагульняючага агляду намеснікам начальніка аддзела па вытворчасці прадукцыі сельскай гаспадаркі Аляксандрам Латушкіным і начальнікам дзяржтэхнагляду Аляксеем Талкачовым з удзелам рэдакцыі.
Вясенняя пасяўная кампанія будучага года чакаецца напружанай. Гаспадаркі, за выключэннем ААТ “Слаўнае”, не справіліся з уздымам зябліва. А час ідзе. Таму і ставілася задача як мага хутчэй прыступіць да рамонту тэхнікі. Сярод лепшых адзначана работа ААТ “Коханава-Агра”, дзе выкананы ўсе патрабаванні да пастаноўкі тэхнікі на зімняе захоўванне. Адрамантавалі тут і паставілі на лінейку гатоўнасці два культыватары. Дарэчы, яшчэ некалькі год таму механічная майстэрня прадпрыемства была ў аварыйным стане. Зараз аб ёй можна гаварыць як аб лепшай у раёне. Тут створаны ўсе ўмовы не толькі для рамонту тэхнікі, але і для працы і адпачынку людзей. У памяшканні цёпла, завяршаецца абсталяванне душавой. Гэта найперш вынік намаганняў кіраўніка гаспадаркі Сяргея Марчанкі.
Добрае ўражанне пакінулі і механічныя двары ААТ “Камсамольская праўда”, УП “Надзёжына”, “Рыдамльскі”. У асноўным усе гаспадаркі з задачай пастаноўкі тэхнікі на зіму справіліся, за выключэннем асобных момантаў на прадпрыемствах “Талачынская Навінка”, “Зорны-Агра”. Галоўнае ў дзейнасці гаспадарак — рамонт тэхнікі. У большасці гаспадарак ён вядзецца маруднымі тэмпамі, некаторыя ўвогуле да яго не прыступілі. Прычына ёсць — недахоп фінансавых сродкаў. Але, як адзначыў Аляксей Талкачоў, трэба знаходзіць магчымасці і планамерна весці рамонт.
Пытанні па фінансавай дапамозе гаспадаркам, безумоўна, будуць вырашацца і на больш высокім узроўні. Але гэта не павінна прыводзіць да таго, каб спадзявацца на іншых і нічога не рабіць самім.
Час ідзе, а ён, як вядома, незваротны.
Марыя ХМЯЛЮК.
НА ЗДЫМКАХ: лінейка гатоўнасці тэхнікі ў “Коханава-Агра” .
Як тэхніку падрыхтуеш, так вясной і папрацуеш,