Зіма не спяшаецца, але дарожнікі і аўтамабілісты ўжо адчулі яе надыход
У шынамантажных майстэрнях адноснае зацішша: сезонны ажыятаж, звязаны з заменаю шын, прайшоў, засталіся толькі кліенты з праколамі, крывымі ды разбалансіраванымі дыскамі. Надвор’е яшчэ не выпрабоўвала дарожнікаў і аўтамабілістаў экстрэмальнымі тэмпературамі ці ападкамі, тым не менш кожны вадзіцель, напэўна, у сёлетнім сезоне ўжо меў магчымасць злёгку адчуць, успомніць, што такое зімовая дарога.
Асабліва ў межах населеных пунктаў — каля дамоў, у гаражных кааператывах і іншых месцах, да якіх спецтэхніка і ў перыяд снегападаў даходзіць не кожны дзень. Што да вялікіх трас, то там да нядаўняга часу зіма нібыта і не давала аб сабе ведаць: дзякуючы насычанаму аўтамабільнаму руху і своечасоваму рэагаванню дарожных службаў асфальт заставаўся голым. Хаця, як вядома, у перыяд зменлівага надвор’я, пасля дзённай адлігі і начнога марозу ён можа аказацца на самай справе абледзянелым і таму вельмі небяспечным.
Стандарты абслугоўвання дарог у зімовы перыяд застаюцца ранейшымі: для павышэння каэфіцыента счаплення колаў з дарожным пакрыццём выкарыстоўваюцца соль, пясчана-солевая сумесь і пры моцных маразах, калі спрабаваць растапіць лёд хімічным спосабам бессэнсоўна, — проста пясок.
Сяргей АБРАМОВІЧ.
НА ЗДЫМКУ: у ДЭУ-8 пяску хопіць на ўсю зіму.
