“Ёлка-фэст 2014”: сабраліся разам на свята
26 снежня жыхары Талачына сталі сведкамі шэсця Дзядоў Марозаў, Снягурак і іншых казачных персанажаў. Яны прадстаўлялі 25 устаноў культуры, адукацыі, прадпрыемстваў раёна і прайшлі па галоўнай вуліцы горада ад аўтастанцыі да навагодняй ёлкі.
Напярэдадні ўрачыстасці Дзяды Марозы пастараліся — на двары стаяла сонечнае зацішнае надвор’е. Праўда, невялікі марозік крыху пашчыпваў насы і шчокі і дзятвы, і дарослых. Як-ніяк, зіма ў самым разгары, да Новага года заставаліся лічаныя дні. Таму і настрой у людзей, асабліва ў дзетвары, быў радасны. Спрыяў гэтаму і продаж святочных сувеніраў і цацак, шарыкаў і прысмакаў.
Каля сотні казачных асоб пацвердзілі сваю гатоўнасць зрабіць калядныя і навагоднія святы вясёлымі і незабыўнымі для дзяцей. З якім натхненнем танцавалі яны, прыцягваючы ў карагод дзяцей і дарослых! Коханаўскія “Балаболы” падрыхтавалі навагодняе тэатралізаванае прадстаўленне. Маленькія гледачы шчыра перажывалі за Снягурку, якая шукала сваё шчасце і ў сваіх прыгодах сустракалася з рознымі персанажамі, у ліку якіх была і Каза — сімвал 2015 года.
Майстар-клас паказалі Дзяды Марозы і Снягуркі з ДБУ-63, Варанцэвіцкага і Звяняцкага СДК. Цікавыя загадкі загадвалі Бабы-Ёшкі з Аболецкага Дома фальклору. На працягу амаль дзвюх гадзін гучалі песні, віхурыліся танцы, праводзіліся конкурсы. І, канешне, не абышлося без навагодніх пачастункаў іх удзельнікаў. Для самых маленькіх, двух-трохгадовых хлопчыкаў і дзяўчынак, гэта быў першы крок у цудоўны свет мастацкай самадзейнасці. І яны яго зрабілі ўпэўнена.
Арганізатары свята — аддзелы ідэалагічнай работы, культуры і па справах моладзі, адукацыі, спорту і турызму райвыканкама, Талачынскі раённы цэнтр культуры і народнай творчасці — падвялі вынікі мерапрыемства. Лепшымі прызнаны Дзяды Марозы і Снягуркі з Коханаўскага пасялковага Дома культуры, Варанцэвіцкага сельскага Дома культуры і ДБУ-63. Прыз у намінацыі “Лепшае выкананне флэшмоба” атрымаў калектыў Райцаў-скага сельскага Дома культуры. Свае сімпатыі гледачы разам з прызам аддалі Дзеду Марозу і Снягурцы са Звяняцкага сельскага Дома культуры.
Марыя ХМЯЛЮК.
Программа новогодних мероприятий