Паставіць кропку ў бясконцых судах і разбіральніцтвах дапаможа камітэт судовых экспертыз
На асабісты прыём да начальніка ўпраўлення Дзяржаўнага камітэта судовых экспертыз Рэспублікі Беларусь па Віцебскай вобласці Юрыя Шчацько 23 студзеня прыйшлі два чалавекі. Праўда, аказалася, што пытанні, з якімі звярнуліся грамадзяне, не адносяцца да кампетэнцыі камітэта.
Камітэт судовых экспертыз займаецца правядзеннем разнастайных экспертных даследаванняў (тэхнічнага, а не юрыдычнага характару) у ходзе расследавання злачынстваў, а таксама аказвае паслугі насельніцтву на платнай аснове. Спектр паслуг даволі шырокі, налічвае, як паведаміў Юрый Анатольевіч, больш за сорак відаў даследаванняў. Сярод іх, напрыклад, экспертыза нумара кузава аўтамабіля, экспертыза фотаздымкаў з мэтаю высвятлення, адна і тая ж асоба знаходзіцца на іх ці розныя людзі, генетычная экспертыза з мэтаю высвятлення, з’яўляюцца людзі роднымі ці не, і шмат іншых.
— Часам некаторыя людзі доўга ходзяць па інстанцыях, судзяцца і ніяк не могуць даказаць сваю правату ў якой-небудзь канфліктнай сітуацыі: суседзі зверху залілі кватэру, ёсць падазрэнне, што на працы няправільна налічылі зарплату, узнікла спрэчка ў сувязі з вызначэннем мяжы зямельнага ўчастка… Пералічваць можна доўга, сітуацыі бываюць самыя разнастайныя. І ў некаторых з іх можна было б проста звярнуцца да нас, заплаціць за паслугу і атрымаць наша заключэнне, якое пакладзе канец усім разбіральніцтвам, — расказаў Юрый Шчацько.
Сяргей АБРАМОВІЧ.