Дзіцячыя забавы і адчуванне свята (+фота)
Любое ўсенароднае свята, якое прынята адзначаць арганізавана, у форме масавых гулянняў, з выязным гандлем, канцэртам пад адкрытым небам, спартыўнымі спаборніцтвамі і іншымі традыцыйнымі забавамі, не атрымалася б па-сапраўднаму вясёлым і радасным, калі б у яго праграме не была ўдзелена самая пільная ўвага інтарэсам дзяцей. Без атракцыёнаў і гандлёвых палатак з цацкамі і кандытарскімі вырабамі месца святкавання рызыкавала б застацца будзённым, шэрым і малалюдным.
У гэтым сэнсе сёлетні Дзень Перамогі атрымаўся, безумоўна, удалым. Батут, надзіманая горка, электрамабілі, катанне на конях, кіданне дроцікаў – усе дзіцячыя забавы былі прывычныя, добра ўсім знаёмыя, але карысталіся ў юных удзельнікаў мерапрыемства вялікім попытам. Парадавала і багацце асартыменту харчовых і нехарчовых тавараў. Цэны іх былі ўпаўне даступныя: порцыя кашы з паходнай кухні (пярлоўка з тушонкаю) – 6000 рублёў, кубак гарбаты з лясных траў – 2000 (1800 без цукру), разнастайныя булачкі і пірожныя – па 2,3,4 тысячы. На прылаўках з цацкамі найбольш унушальныя цэннікі былі, напэўна, на ўзроўні 65000 рублёў (столькі каштаваў сабака на батарэйках, які гаўкае, бліскае вачамі і ходзіць, і іншыя складаныя механізмы).
Для каго падобныя пакупкі не па кішэні, той мог пацешыць дзяцей больш сціплым падарункам, усялякіх мудрагелістых рознакаляровых дробязей таксама хапала, і кожная з іх, з’яўляючыся часцінкаю свята, здольная прынесці дзецям вялікую радасць.
Напэўна, паспрыяла стварэнню бесклапотнай, радаснай атмасферы яшчэ і тая акалічнасць, што праводзілася забаўляльная частка свята на стадыёне. Свежае паветра, трава, рэчка – на такім фоне ў чалавека зусім іншы настрой, чым калі ён топчацца ў натоўпе па гарадскім асфальце ў акружэнні каменных сцен. Адчуванне свабоды і блізкасці да прыроды прыносяць задавальненне, настройваюць на пазітыўны лад.
Словам, дзякуючы спалучэнню такіх фактараў, як зручнае месца, добрае надвор’е і прадуманая, разумная арганізацыя, свята ўдалося.
Уладзімір МІХАЙЛАЎ.
Дзіцячыя забавы і адчуванне свята (+фота),