Райспажыўтаварыства збіраецца парадаваць спажыўцоў цікавымі задумкамі
Сваё прафесійнае свята работнікі спажыўкааперацыі раёна сустракаюць актыўнай працай па абнаўленні матэрыяльнай базы і распрацоўцы новых падыходаў у абслугоўванні насельніцтва. Стымулам для гэтага стала, акрамя ўсяго, набліжэнне абласных “Дажынак”, у сувязі з чым неабходна падрыхтаваць да прыёму гасцей будынкі гандлёвых аб’ектаў. Але першапрычынаю, глыбінным вытокам змен з’яўляецца аб’ектыўная рэальнасць, патрэба ў абнаўленні, бо без прагрэсу, без асваення новых шляхоў няма перспектывы. Менавіта таму райспажыўтаварыства на цяперашнім этапе заклапочана не толькі будаўніча-рамонтнымі работамі, а яшчэ і пашырэннем спектра паслуг і асартыменту тавараў.
ПІЦА І БУЛАЧКІ ПРАМА З ПЕЧЫ
Даўно ўжо было актуальным пытанне абнаўлення рэстарана (на здымку). Уведзены ў дзеянне ў мінулым стагоддзі, сваім фасадам і інтэр’ерам ён не вельмі ўпрыгожваў горад, і атмасфера ў ім вымагала зменаў.
Цяпер тут вядуцца рамонтныя работы. Паводле слоў старшыні райспажыўтаварыства Углік А. І., абноўлены рэстаран прыме наведвальнікаў дзесьці ў першыя дні верасня. Змяніцца павінна літаральна ўсё, ад фасада да столі і падлогі:
— Больш за восем мільярдаў рублёў пойдзе на аплату работ і набыццё новага абсталявання (з іх 2 мільярды 400 мільёнаў з інвестыцыйнага фонду Белкаапсаюза, а астатнія сродкі будзем шукаць самі). Будзе абноўлены фасад, пакрыццё столі, сцен і падлогі. Паставім новую мэблю і тэхналагічнае абсталяванне. Адкрыем уваход у рэстаран праз другі паверх (да гэтага часу ён заставаўся незадзейнічаным).
Кардынальныя змены чакаюць сталовую, плануецца зрабіць з яе піцэрыю (пры гэтым цяперашнія абеды з традыцыйнымі першым, другім і трэцім застануцца).
— Піцэрыя будзе адчынена не толькі на працягу працоўнага дня, а і ў вячэрні час. Гатаваць піцу будуць прама пры кліентах, — падзялілася задумкамі Аляксандра Ігнатаўна.
У кулінарыі таксама не абыдзецца толькі рамонтам. У прыватнасці, новаўвядзеннем павінна стаць выпечка разнастайных булачак на вачах у наведвальнікаў. А водар, які заўсёды суправаджае гэты працэс, будзе прывабліваць новых пакупнікоў.
УСЁ ДЛЯ ДЗЯЦЕЙ
Рэстаран і піцэрыя зацікавяць перш за ўсё людзей сталага ўзросту і моладзь, але не застануцца абдзеленымі ўвагаю і дзеці. Другі паверх універмага каля аўтастанцыі (зараз там завяршаюцца рамонтныя работы) плануецца поўнасцю аддаць пад дзіцячыя тавары:
— У цяперашнім дзіцячым аддзеле ва ўнівермагу №1 у цэнтры горада мы не можам размясціць увесь асартымент, які хацелася б. Разнастайныя спартыўныя тавары, манежы, надзіманыя басейны — усё гэта мы прапануем, калі перанясём дзіцячы аддзел на новыя плошчы. Адбудзецца гэта ў пачатку жніўня. А першы паверх універмага адвядзём пад мэблю і электратавары.
ЗАМЕСТ АЛКАГОЛЮ — КВЕТКІ
Прыемна адзначыць і той факт, што будынак, у якім да нядаўняга часу размяшчалася піўная крама “Пив-Пафф”, пачне служыць больш здаровым і высакародным мэтам — у ім запланавана абсталяваць краму па продажы кветак.
Акрамя таго, як паведаміла наша субяседніца, грыль-бар пераўтворыцца ў мясную лаўку, а начная крама будзе арыентавана пераважна на кандытарскія вырабы і алкаголь.
* * *
Відавочна, што падобныя планы для маштабаў нашага раёна калі не грандыёзныя, то ўсё ж даволі вялікія, а таму жыхарам можна толькі парадавацца за такія перспектывы і пажадаць райспажыўтаварыству паспяхова ўвасобіць іх у жыццё. І яшчэ, канечне, павіншаваць усіх работнікаў сістэмы кааперацыі з прафесійным святам.
Сяргей АБРАМОВІЧ.
