УП “Надзёжына”: з клопатам пра будучы ўраджай
Паспець правесці сяўбу азімых у поўным аб’ёме і з выкананнем усіх тэхналагічных патрабаванняў — адна з найбольш актуальных задач для сельгаспрадпрыемстваў на цяперашнім этапе. Як вядзецца работа ў гэтым напрамку, у канцы мінулага тыдня мы пацікавіліся ва УП “Надзёжына”.
— Узворванне пад сяўбу зерневых вядзём у дзве змены, — расказаў дырэктар прадпрыемства Кірык М. В. — На перадпасяўной апрацоўцы на сённяшні дзень задзейнічаны адзін дыскатар, сяўбу ажыццяўляе адзін пасяўны агрэгат АПП-6. Пасеяць нам неабходна 1100 гектараў зерневых, з іх 500 гектараў жыта і 600 пшаніцы. Для забеспячэння выканання гэтых аб’ёмаў было набыта 50 тон насення-эліты. Працуюць на полі механізатары Уладзімір Быкаў, Аляксандр Новікаў, Сяргей Буры, падвозку збожжа забяспечвае вадзіцель Аляксандр Шымко.
План сяўбы крыжакветных прадпрыемствам ужо выкананы, нават з перавышэннем:
— Пасеялі 250 гектараў рапсу і перастрахаваліся — дадалі яшчэ 65 гектараў сурэпіцы. Яна менш патрабавальная да глебы, лепш пераносіць зіму і хутчэй спее, так што ў выпадку якіх-небудзь неспрыяльных кліматычных з’яў у нейкай ступені кампенсуе нам ураджайнасць.
Сяргей АБРАМОВІЧ.
