Ільновытворчасць: задачы ранейшыя — убраць 800 гектараў і столькі ж зноў пасеяць
Церабленне льну было завершана Коханаўскім ільнозаводам 15 жніўня. На мінулым тыдні вяліся работы па спрасоўванні трасты ў рулоны і дастаўцы яе на тэрыторыю прадпрыемства для захоўваня і перапрацоўкі. Аб асаблівасцях сёлетняй уборачнай кампаніі 14 верасня нам расказалі дырэктар завода Рудзянок М. У. і галоўны аграном Лапчынскі С. А.
У прыватнасці, Сяргей Анатольевіч адзначыў, што звозіцца з поля ў першую чаргу найбольш доўгая траста, якая стане лепшаю сыравінаю. Ёсць і нямала кароткай, таму што нармальнаму росту льну сёлета не спрыяла надвор’е:
— Па прычыне засухі месцамі траста атрымалася даўжынёю да 50-ці сантыметраў. Была затрымка і з уборкаю: з-за высокіх тэмператур і адсутнасці дажджу выцерабленая траста доўга вылежвалася, працэс зацягнуўся на лішніх два тыдні і толькі пасля нядаўніх ападкаў паскорыўся. У выніку цяпер нам неабходна ў як мага больш сціслы тэрмін паспець вывезці ўраджай з палёў.
Тэхнікаю льнозавод забяспечаны, хапае і людзей (працуюць як штатныя работнікі, так і запрошаныя на час уборкі). Ужо нарыхтавана насенне для сяўбы ў наступным годзе:
— Пакуль што забяспечваем сябе самі, але калі будуць дазваляць фінансы, то пастараемся абнавіць насенны фонд, бо сваё насенне ў нас ужо не першай рэпрадукцыі, – растлумачыў Сяргей Лапчынскі. — Вырошчваем мы пакуль што два сарты: французскія «Алізэ» і «Мэрылін».
Паралельна з уборкаю ўраджаю вядзецца і падрыхтоўка плошчаў пад сяўбу:
— План нам даведзены такі ж, як і ў мінулым годзе, 800 гектараў, — паведаміў кіраўнік прадпрыемства. – Зараз уносім гліфасаты, праз два тыдні яны зробяць сваю справу, і можна будзе ўздымаць зябліва.
Відавочна, што надвор’е сёлета не спрыяла ні вырошчанню льну, ні ўборцы. Але калектывам завода, як заўсёды, у рамках магчымага былі прыкладзены ўсе намаганні для дасягнення найлепшага выніку.
Сяргей АБРАМОВІЧ.
