Велашколе — падарункі і пажаданні новых дасягненняў
Раніцаю 3 кастрычніка, пакуль вуліцы Талачына паступова запаўняліся людзьмі і напаўняліся атмасфераю свята, на ўскраіне горада, на стадыёне “Перамога” ўжо адбывалася адно ўрачыстае мерапрыемства, хоць і не звязанае з сельскаю гаспадаркаю, але таксама прымеркаванае да “Дажынак”.
Талачынскую велашколу наведалі з прыемнай місіяй паважаныя госці – прадстаўнікі органаў улады, спартыўных і прафсаюзных устаноў абласнога і рэспубліканскага ўзроўняў. Выхаванцы школы і іх трэнер Анатоль Купрыянец атрымалі віншаванні і падарункі (шлемы, колы, сертыфікаты на веласіпеды і інш.) ад імя Федэрацыі прафсаюзаў Беларусі, аблвыканкама, Беларускай федэрацыі веласіпеднага спорту, веласіпеднага клуба “Мінск”.
Гучалі віншаванні, падзякі, пажаданні поспехаў. Сакратар ФПБ па эканамічных пытаннях Аляксандр Паўлоўскі ў сваім выступлені адзначыў, што ў сувязі з 80-годдзем спартыўнай арганізацыі федэрацыі прынята рашэнне адрамантаваць усе падведамасныя ФПБ спартыўныя аб’екты. І ў Талачынскай школе, якая, па словах Аляксандра Іванавіча, не рамантавалася больш за 30 гадоў, рамонт нарэшце быў праведзены, цяпер наша велабаза мае дастойны выгляд і звонку, і ўнутры.
Намеснік начальніка ўпраўлення спорту і турызму Віцебскага аблвыканкама Пётр Немянёнак уручыў Анатолю Купрыянцу Ганаровую грамату, адзначыў вялікі ўклад Анатоля Леанідавіча ў развіццё веласпорту.
А дырэктар Спартыўнага клуба Федэрацыі прафсаюзаў Беларусі Валянцін Баравок падарыў школе кавалачак веладрому (на здымку) – брусок, з якіх, паводле яго слоў, у 2008 годзе збіраўся веладром у “Мінск-арэне”.
Уладзімір МІХАЙЛАЎ.
