Скупы падаткаплацельшчык плаціць у пяць разоў больш
За 9 месяцаў гэтага года інспекцыяй Міністэрства па падатках і зборах Рэспублікі Беларусь па Талачынскім раёне ў выніку прадухілення фактаў так званага ценявога бізнэсу забяспечана спагнанне з парушальнікаў заканадаўства 9 мільярдаў 106 мільёнаў рублёў. Гэтая сума ўключае ў сябе штрафы, падаткі, выплачаныя ў пяціразовым памеры (такая мера ў адпаведнасці з заканадаўствам прымяняецца разам са штрафам у адносінах да парушальнікаў), і кошт канфіскаваных тавараў.
— Дваццаць тры асобы прыцягнуты да адказнасці за парушэнні прыёму наяўных грашовых сродкаў. Як правіла гэта прыём грошай без выдачы чэка. Агульная сума спагнанняў склала трыццаць мільёнаў рублёў, — расказала намеснік начальніка інспекцыі Шэбека А. І. — Выяўлена дзевяць выпадкаў незарэгістраванай прадпрымальніцкай дзейнасці. З іх чатыры выпадкі перавозкі пасажыраў, тры выпадкі рознічнага гандлю прамысловымі таварамі на даму, адзін выпадак гандлю праз інтэрнэт і адзін — аказання будаўнічых паслуг. Агульная сума спагнаных за НПД штрафаў і падаткаў склала 28,3 мільёна рублёў. Таксама было канфіскавана таварна-матэрыяльных каштоўнасцей на суму 4 мільярды 293 мільёны рублёў.
Вышэйпрыведзеныя факты і лічбы, несумненна, павінны стаць самым пераканаўчым аргументам і разагнаць усе сумненні ў кожнага, хто паддаўся спакусе і задумаўся, ці не паспрабаваць ухіліцца ад выплаты падаткаў.
Сяргей АБРАМОВІЧ.